Կիպրոսի Հանրապետութեան մէջ տեղի ունեցած են Հայաստան-Յունաստան-Կիպրոս եռակողմ պաշտպանական խորհրդակցութիւններ, որոնց ընթացքին քննարկուած են երեք երկիրներու հետաքրքրութիւններու շրջանակներուն մէջ գտնուող անվտանգային շարք մը խնդիրներ եւ համագործակցութեան հարցեր։
Հայկական կողմէ խորհրդակցություններուն մասնակցած է Պաշտպանութեան Նախարարութեան Պաշտպանական Քաղաքականութեան եւ Միջազգային Համագործակցութեան Վարչութեան պետ Լեւոն Այվազեանի գլխաւորած պատուիրակութիւնը:
ՀՀ ՊՆ Լրատուական Վարչութեան փոխանցմամբ, կողմերը վերահաստատած են իրենց պատրաստակամութիւնը՝ համատեղ քայլեր ձեռնարկելու երեք երկիրներու պաշտպանունակութեան եւ ռազմական անվտանգութեան ամրապնդման ուղղութեամբ։
Քննարկումներու բերումով ստորագրուած է եռակողմ ռազմական համագործակցութեան տարեկան ծրագիրը, որ կ’ընդգրկէ շարք մը միջոցառումներ Հայաստանի, Յունաստանի եւ Կիպրոսի մէջ։
Խորհրդակցութիւններու աւարտին պատուիրակութիւնները ընդունած է Կիպրոսի Ազգային բանակի հրամանատար, զօրավար-լեյտենանտ Տիմոքրիթոս Զերվաքիսը։