Հայաստանի Հանրապետութեան վարչապետ Նիկոլ Փաշինեան ընդունած է Ֆրանսայի Ծերակոյտին մէջ մեծամասնութիւն կազմող «Հանրապետականներ» խմբակցութեան նախագահ, Ծերակոյտին մէջ Լեռնային Ղարաբաղի հարցով խումբի հիմնադիր եւ նախագահ, Արեւելքի քրիստոնեաներու հարցով կապի խումբի նախագահ Պրունօ Ռեթայոյի գլխաւորած պատուիրակութիւնը:
Վարչապետը ողջունած է Ծերակոյտի պատուիրակութեան այցը Հայաստան եւ բարձր գնահատած է Ֆրանսայի աջակցութիւնը Հայաստասնին այս բարդ ժամանակաշրջանին: Կառավարութեան ղեկավարը առանձին շնորհակալութիւն յայտնած է Ծերակոյտին` Հայաստանին ու ԼՂ-ին վերաբերող կարեւոր բանաձեւեր ընդունելու համար:
«Այս անգամ դուք այստեղ էք գտնւում Հայոց Ցեղասպանութեան տարելիցի օրը` կարեւոր եւ խորհրդանշական օր մեզ համար: Ինչպէս իմ այսօրուայ ուղերձում եմ նշել` սա անցեալի, ներկայի եւ ապագայի մասին խորհելու ամենապատեհ պահն է», ըսած է վարչապետը:
Պրունօ Ռեթայօն իր հերթին նշած է.
«Այսօր` Ապրիլ 24-ին, մենք հայ ժողովուրդի կողքին ենք եւ ձեզի հետ միասին յարգանքի տուրք կը մատուցենք անմեղ զոհերու յիշատակին: Անոնք նաեւ մեր զոհերն են, որովհետեւ խօսքը կը վերաբերի ամբողջ մարդկութեան ողբերգութեան»:
Ռեթայօն եւս մէկ անգամ յայտնած է Ֆրանսայի աջակցութիւնն ու զօրակցութիւնը Հայաստանին` առկայ խնդիրներու լուծման ու մարտահրաւէրներու յաղթահարման գործին մէջ:
Զրուցակիցները անդրադարձած են Լաչինի միջանցքի ապօրինի շրջափակման հետեւանքով Լեռնային Ղարաբաղի մէջ ստեղծուած մարդասիրական ճգնաժամին, Ատրպէյճանի կողմէ 2020 թուականի Նոյեմբեր 9-ի յայտարարութեան կոպիտ խախտմամբ Լաչինի միջանցքին ապօրինի անցակէտի տեղադրման, Լեռնային Ղարաբաղի հակամարտութեան, Հայաստանի եւ Ատրպէյճանի միջեւ յարաբերութիւններու կարգաւորման վերաբերող հարցերու:
Տարածաշրջանին մէջ անվտանգութեան եւ կայունութեան ապահովման առումով կարեւորուած է Հայաստանի մէջ Եւրոպական Միութեան դիտորդական առաքելութեան արդիւնաւէտ գործունէութիւնը:
