Արցախի Հանրապետութեան նախագահ Արայիկ Յարութիւնեանը Ապրիլ 24-ին ուղերձ յղած է Ցեղասպանութեան զոհերու յիշատակի օրուան առիթով: Ուղերձին մէջ, մասնաւորապէս, ըսուած է.
«Սիրելի՛ հայրենակիցներ,
Ամէն տարի Ապրիլի 24-ին մենք ազգովի յիշում եւ ոգեկոչում ենք Հայոց Ցեղասպանութեան անմեղ զոհերի յիշատակը, մեր 1,5 միլիոն սուրբ նահատակների, որ դարձան թուրքական եաթաղանի զոհ միայն այն բանի համար, որ հայ էին:
Մարդկութեան դէմ ուղղուած այդ հրէշաւոր ոճրագործութիւնը վաղեմութեան ժամկէտ չունի: Եւ քանի դեռ այն չի ճանաչուել ու դատապարտուել ամբողջ քաղաքակիրթ աշխարհի կողմից, մենք կարող ենք ականատես լինել ցեղասպանութեան նոր դրսեւորումների ամբողջ աշխարհում:
Այսօր Արցախը կանգնած է թուրք-ատրպէյճանական հայատեաց ու ցեղասպանական քաղաքականութեան նոր եւ իրական վտանգների առջեւ: Մեծ Եղեռնից 108 տարի անց էլ հայը շարունակում է կենաց-մահու պայքար մղել իր հայրենիքում ազատ ու անկախ ապրելու, սեփական իրաւունքներն ու ազատութիւնները, ազգային շահերն ու արժանապատուութիւնը պաշտպանելու համար:
134 օր շարունակուող շրջափակման մէջ պահելով Արցախի 120 հազար խաղաղ բնակչութեանը, տասնեակ հազարաւոր երեխաների ու ծերերի, ոտնահարելով միջազգային իրաւունքի բոլոր նորմերն ու սկզբունքները, անտեսելով միջազգային հանրութեան յորդորները եւ ՄԱԿ-ի Արդարադատութեան Միջազգային Դատարանի որոշումը` Ատրպէյճանի բռնապետական իշխանութիւնները փորձում են ծնկի բերել մեր ժողովրդին:
Սակայն մենք անդրդուելի ենք ու վճռական Արցախը միշտ հայկական ու անառիկ պահելու ճանապարհին: Մենք այլընտրանք չունենք: Հայը չի կարող նորից հայրենիք կորցնել, դառնալ տարագիր ու սփռուել աշխարհով մէկ: Մենք պէտք է դասեր քաղենք անցեալից ու միասնաբար կերտենք հայ ժողովրդի ապագան` այսօր եւ այստեղ:
Պահն օրհասական է, լինել-չլինելու հարց է ոչ միայն Արցախի, այլեւ` հայոց պետականութեան համար: Այսօր քան երբեւէ պէտք է խօսքից անցնել գործի: Համազգային պատասխանատուութեան, արժանապատուութեան, պահանջատիրութեան պահն է` կանգնել Արցախի կողքին եւ կանխել նորանոր համազգային ողբերգութիւններն ու ձախողումները
Ուստի, ապաւինելով Մայր Հայրենիքին, աշխարհասփիւռ հայութեանը եւ օտարերկրեայ բարեկամներին` մենք բոլոր կազմակերպութիւններին ու սրտացաւ անձանց խնդրում ու յորդորում ենք կիրառել բոլոր հնարաւոր գործիքակազմերը ի պաշտպանութիւն Արցախի մաքառող ժողովրդի` յանուն հայոց համազգային շահերի եւ համամարդկային արժէքների:
Աստուած պահապան հայ ազգին»:
