«Որպէս Ծանրամարտի Եւրոպայի 2023 թուականի ախոյեանութիւնը հիւրընկալող կողմ լուրջ մտահոգութեամբ ենք ընդունել Ապրիլի 14-ին առաջնութեան բացման արարողութեան ժամանակ Ատրպէյճանի Հանրապետութեան պետական դրօշի հետ կապուած միջադէպը: Միջադէպը, որն արարողութեան ժամանակ անմիջապէս հարթուել է եւ որեւէ կերպ չի խոչընդոտել բնական ընթացքին, չի արտայայտում Հայաստանի Հանրապետութեան իշխանութիւնների դիրքորոշումը եւ դատապարտելի է մարզական արժէքների եւ արդար խաղի (Fair Play) համընդհանուր սկզբունքների տեսանկիւնից:
Միաժամանակ, ափսոսանքով ենք արձանագրում Ատրպէյճանի խումբի` առաջնութիւնը լքելու վերաբերեալ կայացրած որոշումը եւ յաւելում, որ անվտանգութեան հետ կապուած որեւէ խնդիր չի եղել, քանի որ Հայաստանի Հանրապետութեան կառավարութիւնն ի սկզբանէ ապահովել է եւ շարունակում է ապահովել անվտանգութեան բոլոր չափանիշներն առաջնութեան մասնակից պատուիրակութիւնների համար: Կառավարութիւնը հաւատարիմ էր լրացուցիչ անվտանգային միջոցառումներ ապահովելու ատրպէյճանցի մարզիկների համար նախկինում իր կողմից ստանձնուած պարտաւորութեանը: Դրա վկայութիւնն այն է, որ գրեթէ երկու օր ատրպէյճանցի մարզիկներն անվտանգ եւ ապահով գտնուել են Հայաստանում, իսկ ախոյեանութիւնը լքելու որոշումն ընդունելուց յետոյ համապատասխան ծառայութիւններն ապահովել են նրանց անվտանգ մեկնումը:
Այս ախոյեանութեանը պատրաստուելիս Հայաստանի Հանրապետութիւնն իրականացրել է մեծածաւալ աշխատանք եւ նշանակալի ներդրումներ: Կացութեան, մարզումների, մրցումների պայմանները, տեխնիկական ապահովումը, հեռուստատեսային ցուցադրութիւնը, նախադէպը չունեցող բացման արարողութիւնն ամենաբարձր գնահատականի են արժանացել մեր միջազգային գործընկերների կողմից: Բազմաթիւ արձանագրումներով` Հայաստանում անցկացուող Եւրոպայի այս առաջնութիւնն իր կազմակերպմամբ վստահօրէն կարող է մրցել աշխարհի ախոյեանութիւնների կազմակերպման հետ: Համոզուած եմ, որ մրցաշարի աւարտից յետոյ կը կարողանանք արձանագրել, որ Հայաստանը կարող է յաւակնել կազմակերպելու աւելի մեծ մրցաշարեր, այդ թւում` աշխարհի առաջնութիւնը»:
Նշենք, որ Ապրիլ 14-ին, Երեւանի Կարեն Դեմիրճեանի անուան մարզահամերգային համալիրին մէջ Ծանրամարտի Եւրոպայի ախոյեանութեան բացման հանդիսաւոր արարողութեան ժամանակ հագուստի ձեւաւորող Արամ Նիկոլեանը այրած էր Ատրպէյճանի դրօշը:
Աւելի ուշ յայտնի դարձաւ, որ ան հեղինակած եւ կարած է Ծանրամարտի Եւրոպայի ախոյեանութեան բացման հանդիսաւոր արարողութեան ներկայ ներկայացուցիչներուն զգեստները, այդ շարքին` Ատրպէյճանի դրօշովը:
«Հայկական Ժամանակ»-ի տեղեկութիւններով` ներկայացուցիչներուն զգեստները հեղինակելու եւ կարելու համար Արամ Նիկոլեանը, ըստ պայմանագրին, պիտի ստանայ 18,9 միլիոն դրամ, որմէ 12,3 միլիոն դրամը արդէն ստացած է:
