Վազգէն Մանուկեանի գործով դատական նիստին դատախազ Արմէն Գէորգեանը մեղադրական ճառի ժամանակ միջնորդեց պատերազմէն յետոյ ստեղծուած ընդդիմադիր «Հայրենիքի Փրկութեան Շարժումը» առաջնորդած ընդդիմադիր գործիչը տուգանել նուազագոյն աշխատավարձի 500-ապատիկի չափով:
77-ամեայ Մանուկեանը կը մեղադրուի իշխանութիւնը զաւթելուն եւ սահմանադրական կարգը բռնի տապալելուն ուղղուած հրապարակային կոչերու համար: Ընդդիմադիր գործիչը, սակայն, չ’ընդունիր իրեն առաջադրուած մեղադրանքը:
Դատախազը յայտնեց, որ պատիժը մեղմացնող հանգամանք եղած են Մանուկեանի տարիքը, նախապէս անոր զբաղեցուցած պաշտօնները:
Արմէն Գէորգեանը դատարանէն նաեւ պահանջեց մինչ դատավճռի հրապարակումը անփոփոխ թողել ամբաստանեալին նկատմամբ կիրառուած խափանման միջոցը` ստորագրութիւնը չհեռանալու մասին:
Մինչ մեղադրող կողմը կը յայտարարէ, որ մեղադրանքը ապացուցուած է, պաշտպանական կողմը կը պնդէ, որ Մանուկեանի յայտարարութիւնները չեն կրնար համարուիլ իշխանութիւնը զաւթելուն եւ սահմանադրական կարգը բռնի տապալելուն ուղղուած հրապարակային կոչեր: Ըստ պաշտպան Էրիկ Ալեքսանեանի` անոնք բռնութեան ուղերձներ չեն, այլ՝ քաղաքական քննադատութիւն:
Պաշտպանական կողմը խնդրեց արդարացնել Վազգէն Մանուկեանը:
Նիստը յետաձգուեցաւ, յաջորդը նշանակուեցաւ Ապրիլ 29-ին: