Վարդենիսի ուղղութեամբ հրետանային միջոցներու առկայութիւնը անմիջականօրէն կապուած է Ատրպէյճանի զինուած ուժերուն կողմէ լրացուցիչ ուժերու եւ միջոցներու տեղաշարժով ու բացազատման հետ, որ յառաջացուցած է որոշակի լարուածութիւն, կը տեղեկացնէ Հայաստանի ռազմական գերատեսչութիւնը` մեկնաբանելով Պաքուի յայտարարութիւնը, թէ հայկական կողմը յաւելեալ ուժեր` հետեւակ եւ հրետանի կը կուտակէ Տաշքեսանի ուղղութեամբ:
Երեւանը կը նշէ, որ հայկական կողմի քայլերը իրականացուած են տուեալ գօտիին մէջ ատրբեջպէյճանական հրետանային եւ զենիթային յաւելեալ միջոցներու տեղակայումէ յետոյ եւ կը կրեն բացառապէս պաշտպանական բնոյթ:
Հայկական կողմի գործողութիւնները իրադրութիւնը լարելու նպատակ չունին, կը շեշտէ Պաշտպանութեան Նախարարութիւնը` ընդգծելով, որ ատրպէյճանական կողմի` յիշատակուած միջոցները տուեալ ուղղութենէն դուրս բերելու պարագային, հայկական կողմը եւս դուրս պիտի բերէ իր յաւելեալ միջոցները:
«Հայկական կողմը պատրաստ է տուեալ հարցի շուրջ բանակցելու», ըսուած է յայտարարութեան մէջ:
Նշենք, որ պաշտօնական Պաքուն հաղորդած էր, որ Հոկտեմբեր 16-էն կը նկատեն զինուորներու եւ հրետանիի 4 միաւորներու տեղադրում Ատրպէյճանի բանակի դիրքերուն դիմաց` Տաշքեսանի ուղղութեամբ, նշելով որ «տարածաշրջանին մէջ հնարաւոր սրման համար պատասխանատուութիւնը Հայաստանի ռազմաքաղաքական ղեկավարութիւնը պիտի կրէ»:
