Ատրպէյճանի արտաքին գործերու նախարար Էլմար Մամետեարովը հերթական անգամ յայտարարած է, որ պաշտօնական Պաքուն հնարաւոր չի համարեր Լեռնային Ղարաբաղի իշխանութիւններու ուղղակի մասնակցութիւնը հիմնախնդրի շուրջ բանակցութիւններուն:
«Եթէ Հայաստանի ղեկավարութիւնը կ’առաջարկէ բանակցային գործընթացին Լեռնային Ղարաբաղի մասնակցութիւնը, կը նշանակէ վերջ դնել խաղաղ գործընթացին», – յայտարարած է Մամետեարովը՝ աւելցնելով, որ այդ հարցը վերջերս ԵԱՀԿ Մինսկի խումբի համանախագահներու հետ քննարկուած է Փարիզի մէջ:
Մամետեարովի խօսքով՝ ինքը համանախագահներուն ըսած է, որ հայկական կողմի առաջարկը «ծիծաղելի է»:
23 Մայիսին հայկական կողմի նախաձեռնութեամբ հեռախօսազրոյց կայացած է Հայաստանի եւ Ռուսիոյ արտաքին գործոց նախարարներ Զոհրապ Մնացականեանի եւ Սերկէյ Լաւրովի միջեւ, որու ժամանակ, ըստ Հայաստանի արտաքին գործոց նախարարութեան հաղորդագրութեան, Մնացականեանը վերահաստատած է Հայաստանի յանձնառութիւնը ղարաբաղեան հիմնահարցի բացառապէս խաղաղ հանգուցալուծման ԵԱՀԿ Մինսկի խումբի համանախագահութեան շրջանակներու մէջ:
Անցնող շաբաթ Ատրպէյճանի արտաքին գործոց նախարարը Փարիզի մէջ հանդիպում ունեցած էր Մինսկի խումբի համանախագահներու հետ եւ պնդած, թէ Հայաստանի ու Ատրպէյճանի մէջ աւարտուած ընտրական գործընթացներէն յետոյ Պաքուն պատրաստ է «բանակցութիւններ վարել ղարաբաղեան խնդիրը շուտափոյթ կարգաւորելու համար»:
Էլմար Մամետեարովը նաեւ ըսած է․- «Մեր հիմնական խնդիրը ատրպէյճանական հողերու՝ Լեռնային Ղարաբաղի եւ եօթ շրջաններու տիրացումն է»:
Ըստ արտաքին գործոց նախարարի՝ Ատրպէյճանը պատրաստ է յարաբերութիւններ հաստատել հայերու հետ իր տարածքային ամբողջականութիւնը վերականգնելէ յետոյ»:
