Արցախէն բռնի տեղահանուած շուրջ 11 հազար մարդ արտագաղթած է Հայաստանէն, յայտարարած է Արցախի Մարդու իրաւունքներու պաշտպան Գեղամ Ստեփանեանը՝ արցախցիներու իրաւունքներու, Հայաստանի անվտանգութեան հարցերով իրաւապաշտպաններու մասնակցութեամբ համաժողովի ընթացքին։
«Հիմնական պատճառը ընկերա-կենցաղային պայմաններն են, որոնք խաթարում են մարդկանց բնականոն կեանքը Հայաստանում, դրա համար նախընտրում են տեղափոխուել օրինակ՝ Ռուսաստանի հարաւային հատուածներ, որտեղ շատ աւելի էժան է կազմակերպել կեանքը, քան Հայաստանում», ըսած է Ստեփանեան։
Արցախի ՄԻՊ-ը ներկայացուցած է նաեւ Արցախէն տեղահանուելէն յետոյ Հայաստանի մէջ աշխատանքի տեղաւորուած անձերուն թիւը՝ 10 հազար 800։
«Ամենացաւալին այն է, որ այս թուերի մէջ շատ քիչ տոկոս են կազմում յատկապէս կրթութեան բնագաւառի ներկայացուցիչները, ընդամէնը 220 ուսուցիչ է, որ Հայաստանի կրթական հաստատութիւններում է այսօր աշխատում, մինչդեռ, Արցախում 4 հազար ուսուցիչ ենք ունեցել», նշած է Ստեփանեան։
Արցախի մէջ 2023-ի սեպտեմբերեան մարտական գործողութիւններուն հետեւանքով աւելի քան 100 հազար հայեր ստիպուած լքեցին իրենց տուները, ընդհանուր առմամբ, յարձակման հետեւանքով աւելի քան 200 մարդ զոհուեցաւ։ 181 զինուոր ճանչցուած է զոհուած, 11-ը՝ անհետ կորսուած։ Ատրպէյճանի մէջ, ըստ հայաստանցի իրաւապաշտպաններու, հիմա 23 հայ կը պահուի, անոնց շարքին՝ Արցախի նախկին ղեկավարները։
