Սպառազինութեան ոլորտին մէջ ռուսաստանեան ընկերութիւններու հետ ունեցած խնդրայարոյց հարցերը մեծամասամբ կարգաւորուած են, սակայն շարք մը խնդիրներ կը շարունակեն մնալ չլուծուած, «Ազատութեան» գրաւոր հարցումին ի պատասխան յայտնած են Պաշտպանութեան նախարարութենէն՝ չյստակացնելով, որ արդեօք խօսքը 400 միլիոն տոլարի շրջանակին մէջ իրականացուած մատակարարումներուն մասին է:
Արցախեան երկրորդ պատերազմէն յետոյ Հայաստանի իշխանութիւնները ամենաբարձր մակարդակով կը դժգոհէին, թէ Ռուսաստանին միլիոնաւոր տոլարներ փոխանցած են, սակայն զէնք չեն ստացած:
Ռուսաստանի դեսպանը, մինչդեռ, մէկ ամիս առաջ պնդած էր, թէ ռազմատեխնիկական համագործակցութեան ոլորտին մէջ Երեւանի եւ Մոսկուայի միջեւ կնքուած գրեթէ բոլոր պայմանագրերը աւարտած են ժամանակին:
Իշխանական պատգամաւորները միայն վերջերս յայտնեցին, որ Ռուսաստանը արդէն մատակարարումներ կ’իրականացնէ: Պաշտպանութեան յանձնաժողովի անդամ Գագիկ Մելքոնեան մօտ մէկ շաբաթ առաջ «Ազատութեան» ըսած էր, որ ռուսական զէնքի խմբաքանակ մը արդէն Հայաստան հասած է:
