Եւրոպայի Խորհուրդի Խորհրդարանական Վեհաժողովի (ԵԽԽՎ) Ատրպէյճանի եւ Հայաստանի վերահսկողութեան համազեկուցողները հանդէս եկած են յայտարարութեամբ` վերահաստատելով Լաչինի միջանցքը վերաբանալու կոչը:
«Մենք կը վերահաստատենք 2022 թուականի Դեկտեմբեր 16-ին հրապարակուած` Լաչինի միջանցքով ազատ տեղաշարժի վերականգնման մեր կոչը եւ կը յիշեցնենք Մարդու Իրաւունքներու Եւրոպական Դատարանի 2022 թուականի Դեկտեմբեր 21-ի որոշումը եւ Արդարադատութեան Միջազգային Դատարանի 2023-ի Փետրուար 22-ի վճիռը. վերջինին մէջ նշուած է, որ «Ատրպէյճանը պէտք է ձեռնարկէ իր տրամադրութեան տակ եղած բոլոր միջոցները` ապահովելու մարդոց, փոխադրութեան միջոցներու եւ բեռերու անարգել տեղաշարժը Լաչինի միջանցքով երկու ուղղութիւններով», ըսուած է յայտարարութեան մէջ:
«Ի գիտութիւն ընդունած ենք, որ Հայաստանը յայտնած է Ապրիլ 23-ին Լաչինի միջանցքին անցակէտի տեղադրման հարցով Արդարադատութեան Միջազգային Դատարան դիմելու մտադրութեան մասին», կը յայտարարեն եւրոպացի չորս խորհրդարանականները:
«Կոչ կ’ընենք Ատրպէյճանին եւ Հայաստանին ձեռնպահ մնալու որեւէ միակողմանի քայլերէ, որոնք կրնան աւելի բարդացնել Եւրոմիութեան կողմէ ամենաբարձր մակարդակով եւ Հայաստանի մէջ ԵՄ առաքելութեան ներկայութեամբ աջակցուող բանակցային ջանքերը: Կոչ կ’ընենք աշխուժացնելու սահմանային հարցերու շուրջ բանակցութիւնները եւ բոլոր վէճերը լուծելու խաղաղ ճանապարհով», նշուած է յայտարարութեան մէջ:
