ՀՀ վարչապետ Նիկոլ Փաշինեան կը կարեւորէ Լեռնային Ղարաբաղ եւ Լաչինի միջանցք միջազգային փաստահաւաք առաքելութիւն գործուղելը եւ անոր հասնելու համար հետեւողական աշխատանքի իրականացումը: Փաշինեան այս մասին ըսաւ ՀՀ կառավարութեան Յունուար 26-ի նիստին:
Վարչապետը նախ ընդգծեց, որ Լեռնային Ղարաբաղի հայութիւնը իրենց տուներէն արտաքսելը Ատրպէյճանի միակ նպատակը չէ: Այս սադրիչ գործողութիւններով Ատրպէյճանը նպատակ ունի նաեւ խափանել խաղաղութեան օրակարգը, խաղաղութեան բանակցային գործընթացը եւ նոր պատերազմ հրահրել տարածաշրջանին մէջ: «Հասկանալի է, ի հարկէ, որ Լաչինի միջանցքի փակման եւ ԼՂ-ում ստեղծուած մարդասիրական ճգնաժամը մենք բոլորս շատ զգացական ենք տանում: Բայց պէտք է կրկին ընդգծեմ այս իրավիճակի շուրջ զսպուածութեան անհրաժեշտութիւնը եւ խաղաղութեան օրակարգին հակասող բառապաշարի ու գործողութիւնների բացառումը` առաւել եւս պետական իշխանութեան ներկայացուցիչների կողմից: Մենք շարունակում ենք հետեւողական լինել խաղաղութեան օրակարգի յառաջմղման մեր ջանքերում եւ որեւէ սադրանքով մեզ հնարաւոր պէտք է չլինի շեղել այս օրակարգից», ըսաւ Փաշինեան:
Միեւնոյն ժամանակ վարչապետը ընդգծեց, որ պէտք է շարունակել իշխանութեան, ընդդիմութեան, քաղաքացիական հասարակութեան, հայաստանեան եւ սփիւռքի անհատներու եւ կազմակերպութիւններու համատեղ ջանքերը` ԼՂ հայութեան իրաւունքներուն եւ անվտանգութեան նկատմամբ իրականացուող ոտնձգութիւններուն վրայ միջազգային ուշադրութիւն կեդրոնացնելու ուղղութեամբ: Փաշինեան նաեւ շնորհակալութիւն յայտնեց այն երկիրներուն ու կազմակերպութիւններուն, որոնք ստեղծուած իրավիճակին կ’արձագանգեն առարկայականօրէն եւ անկողմնակալ` յենուելով մարդու իրաւունքներու եւ երկիրներուն ստանձնած միջազգային պարտաւորութիւններուն վրայ:
Ան ընդգծեց, որ արդէն երկար ժամանակէ Ատրպէյճան կը փորձէ միջազգային հանրութիւնը համոզել, որ Լաչինի միջանցքը ամենեւին ալ փակ չէ, որ ԼՂ-ի կազամատակարարումն ու հոսանքի մատակարարումը դադրեցուած չէ: «Ակնյայտօրէն Հայաստանն ու Լեռնային Ղարաբաղը հակառակն են պնդում: Կարծում եմ` հէնց այս հակասութիւնը տէ իւրէ լուծելու լաւագոյն ձեւը Լեռնային Ղարաբաղ եւ Լաչինի միջանցք միջազգային փաստահաւաք առաքելութիւն գործուղելն է: Եւ մենք հետեւողականօրէն պէտք է աշխատենք այս ուղղութեամբ», նշեց Փաշինեան:
Վարչապետին համոզմամբ` ընդհանուր առմամբ` տարածաշրջանին մէջ առկայ բոլոր խնդիրներու խաղաղ կարգաւորումը այլընտրանք չունի, եւ հայկական կողմը պիտի առաջնորդուի նոյնինքն այս տրամաբանութեամբ` հասկնալով բոլոր դժուարութիւններն ու բարդութիւնները:
