Եւրոմիութեան Արտաքին Գործողութիւններու Ծառայութեան աղբիւրը «POLITICO» պարբերականին հաստատած է, որ Ատրպէյճանի հետ Հայաստանի սահմաններուն ԵՄ նոր երկարաժամկէտ դիտորդական առաքելութիւն տեղակայելու նախապատրաստական ծրագիրները վերջնական տեսքի բերուած են:
Աղբիւրին խօսքով` «որոշ քայլեր դեռ պէտք է յստակացուին, որմէ յետոյ որոշման նախագիծը պիտի ուղարկուի Քաղաքական եւ Անվտանգութեան Կոմիտէ` երկու տարուան մանդատ ստանալու ակնկալիքով»:
Կը նախատեսուի, որ Հայաստանի մէջ պիտի տեղակայուի մինչեւ 100 դիտորդ:
Միաժամանակ, եւրոպացի պաշտօնեան ընդգծած է, որ Ռուսիոյ հետ լարուած յարաբերութիւնները պէտք է հաշուի առնուին` ի նկատի ունենալով վերջինիս ներկայութիւնը տարածաշրջանին մէջ:
«Ռուսիոյ Անվտանգութեան Դաշնային Ծառայութիւնը Հայաստանի մէջ ամէնուր է: Մենք քանի մը դէպք ունեցած ենք, երբ ռուս սահմանապահները մեր դիտորդները ետ ուղարկած են, նոյնիսկ այն պարագային, որ անոնց կ’ուղեկցէին ՀՀ Պաշտպանութեան Նախարարութեան պաշտօնեաները», յայտնած է «POLITICO»-ի աղբիւրը:
Ռուսիոյ արտաքին գործերու նախարար Սերկէյ Լաւրով Յունուար 18-ին ըսած էր.
«Մենք հիմա ալ պատրաստակամ ենք ՀԱՊԿ առաքելութիւն ուղարկելու Հայաստանի եւ Ատրպէյճանի սահման: Թէեւ մենք դաշնակիցներ ենք, սակայն հայկական կողմը կը նախընտրէ Եւրոմիութեան հետ պայմանաւորուիլ, որպէսզի ԵՄ քաղաքացիական առաքելութիւնը երկարաժամկէտ տեղակայուի: Պէտք չէ մոռնալ, որ խօսքը կը վերաբերի Ատրպէյճանի հետ սահմանին, եւ ԵՄ առաքելութիւնը կրնայ հակարդիւնաւէտ ըլլալ առանց Պաքուի համաձայնութեան»: