Տեղի ունեցած է շատ կարեւոր իրադարձութիւն: ՀՀ կառավարութեան նիստի ընթացքին ՀՀ վարչապետ Նիկոլ Փաշինեան այսպիսի գնահատական տուած է Եւրոպական Խորհրդարանի Յունուար 18-ին ընդունած զեկոյցին:
«Եւրոպական խորհրդարանի` Յունուարի 16-19-ը տեղի ունեցած լիագումար նստաշրջանի ընթացքում, այսինքն` Յունուարի 18-ին կայացած քուէարկութեամբ ընդունուել է «Ընդհանուր արտաքին եւ անվտանգային քաղաքականութեան իրականացում. 2022 թուականի տարեկան զեկոյցը», որը զեկուցել է արտաքին յարաբերութիւնների յանձնաժողովի նախագահ Տէյվիտ Մքալիսթրնը:
Այդ փաստաթղթում չափազանց կարեւոր արձանագրումներ կան մեր տարածաշրջանի եւ Հայաստանի Հանրապետութեան մասին: Մասնաւորապէս, զեկոյցը խստօրէն դատապարտում է Հայաստանի ինքնիշխան տարածքի նկատմամբ Ատրպէյճանի 2022 թուականի Սեպտեմբերի յարձակումը, որը գնահատել է որպէս զինադադարի խախտում եւ խաղաղութեան գործընթացի համար լուրջ, բացասական հետեւանքներ ունեցող գործողութիւն:
Վերահաստատել է, որ Հայաստանի տարածքային ամբողջականութիւնը պէտք է լիարժէքօրէն յարգուի եւ կոչ է արել ատրպէյճանական իշխանութիւններին` անմիջապէս դուրս բերել զօրքերը Հայաստանի բոլոր տարածքներից: Համոզմունք է արտայայտում առ այն, որ ռազմական միջոցներով Հայաստանի եւ Ատրպէյճանի միջեւ կայուն խաղաղութեան հասնել հնարաւոր չէ: Դա պահանջում է համապարփակ քաղաքական կարգաւորում` միջազգային իրաւունքին համապատասխան, ներառեալ ՄԱԿ-ի կանոնադրութիւնը, ԵԱՀԿ 1975 թուականի Հելսինքեան եզրափակիչ ուխտը, ինչպէս նաեւ ԵԱՀԿ Մինսքի Խումբի 2009 թուականի հիմնարար` տարածքային ամբողջականութեան, ինքնորոշման եւ ուժի չկիրառման սկզբունքները: Մտահոգութիւն է արտայայտում Ատրպէյճանի զինուած ուժերի կողմից հայ ռազմագերիների ու քաղաքացիական անձանց նկատմամբ պատերազմական յանցագործութիւնների ու անմարդկային վերաբերմունքի կապակցութեամբ եւ կոչ է անում ատրպէյճանական իշխանութիւններին` ազատել իրենց հսկողութեան տակ գտնուող ռազմագերիներին: Ընդգծում է, որ Հայաստանի եւ Ատրպէյճանի միջեւ համապարփակ խաղաղութեան պայմանագիրը պէտք է հասցէագրի հակամարտութեան արմատական պատճառները, ներառեալ` Լեռնային Ղարաբաղում ապրող հայ բնակչութեան իրաւունքներն ու անվտանգութիւնը, տեղահանուած անձանց ու փախստականների վերադարձը, մշակութային, կրօնական ու պատմական ժառանգութեան պաշտպանութիւնն ու պահպանումը, ինչպէս նաեւ տարածքային ամբողջականութիւնը: Ողջունում է Ատրպէյճանի հետ Հայաստանի սահմանին Եւրոմիութեան քաղաքացիական առաքելութեան տեղակայութիւնը եւ կոչ է անում Եւրոմիութեան Խորհրդին` ընդլայնել տեղակայուած փորձագէտների քանակը, աւելացնել առաքելութեան կարողութիւնները, ամրապնդել ներկայութիւնը տարածաշրջանում: Խստօրէն դատապարտում է Ատրպէյճանի կողմից Լաչինի միջանցքի ապօրինի շրջափակումը, որը 2020 թուականի Նոյեմբերի 9-ի եռակողմ յայտարարութեան խախտում է, քանի որ այն կարող է ստեղծել կանխամտածուած մարդասիրական ճգնաժամ` Լեռնային Ղարաբաղի ժողովրդի համար: Պահանջում է Ատրպէյճանի իշխանութիւններից` անյապաղ վերականգնել Լաչինի միջանցքով ազատ տեղաշարժը: Յիշեցնում է, որ միայն դիւանագիտական միջոցներով է հնարաւոր հասնել արդար եւ տեւական կարգաւորման` յօգուտ Հայաստանի եւ Ատրպէյճանի բնակչութեան:
Այս փաստաթուղթն ընդունուել է 407 կողմ, 92 դէմ, 142 ձեռնպահ ձայների յարաբերակցութեամբ: Պիտի ընդգծեմ, որ այս փաստաթուղթը միայն Հայաստանի մասին չէ, այն շատ ծաւալուն փաստաթուղթ է, 92-ից 99-ը կէտերը վերաբերում են Հայաստանի Հանրապետութեանը, Լեռնային Ղարաբաղին, մեր տարածաշրջանին:
Ընդունուած փաստաթուղթը շատ կարեւոր է այն առումով, որ ըստ էութեան արտայայտում է առարկայական իրականութիւնը, եւ պէտք է նաեւ այս առումով շնորհակալութիւն յայտնեմ Եւրոպական Խորհրդարանի պատգամաւորներին, Հայաստանի Հանրապետութեան մեր այն գործընկերներին, ովքեր շարունակական, հետեւողական աշխատել են առարկայական տեղեկատուութիւնը Եւրոխորհրդի պատգամաւորներին եւ մեր գործընկերներին հասցնելու ուղղութեամբ: Մենք պէտք է շարունակենք մեր ջանքերն այս ուղղութեամբ եւ, ի վերջոյ, հասնենք հռչակուած քաղաքական օրակարգի իրականացմանը», ըսած է Հայաստանի վարչապետը:
