Արցախի շուրջ տեղի ունեցող վերջին օրերու իրադարձութիւններուն կապակցութեամբ ՍԴՀԿ Հայաստանի վարչութիւնը հանդէս եկաւ հետեւեալ յայտարարութեամբ.
«Սոցիալ Դեմոկրատ Հնչակեան կուսակցութեան Հայաստանի վարչութիւնը խստիւ դատապարտում է Ատրպէյճանական իշխանութիւնների կողմից բացայայտօրէն կազմակերպուած եւ ուղղորդուած` «բնապահպան» ատրպէյճանի քաղաքացիների կողմից Լաչինի մարդասիրական միջանցքի փակումը:
«Այդ սադրիչ քայլով եւ դրան զուգահեռ` դէպի Արցախ կազի մատակարարման կասեցումով, Ատրպէյճանական իշխանութիւնները յստակ նպատակ են հետապնդում ահաբեկելու Արցախի հերոսական ժողովրդին եւ ստիպելու նրան լքել իր հայրենի հողը: Փաստօրէն, այսօր 120.000 Արցախցի զրկուած է ազատ տեղաշարժուելու իրաւունքից, առաջին անհրաժեշտութեան դեղորայքից, հացահատիկից եւ այլ միջոցներից:
«Խաղաղ բնակչութեան դէմ սանձազերծուած այս անմարդկային արարքը, որ յղի է ծանր եւ անկանխատեսելի հետեւանքներով, պէտք է արժանանայ միջազգային համարժէք հակազդեցութեան եւ անյապաղ կասեցուի: Ուստի, կոչ ենք անում ռուս խաղաղապահներին կատարել իրենց ստանձնած պարտականութիւնները եւ վայրկեան առաջ բացել ճանապարհը:
«Միջազգային հանրութեան` մասնաւորապէս ԵԱՀԿ Մինսկի խմբի համանախագահ` ԱՄՆ-ին եւ Ֆրանսիային` կոչ ենք անում չբաւարարուել միայն քաղաքական գնահատական հնչեցնելով, այլ պատժամիջոցների սպառնալիքի տակ պարտադրել Պաքուի իշխանութիւններին հետ կանգնել իրավիճակը ապակայունացնող շարունակական գործողութիւններից:
«Այս չափազանց պատասխանատու պահին, անելիք ունենք նաեւ մենք` համայն հայութիւնը: Այդ առումով, աւելի քան երբեւէ մեզ անհրաժեշտ է լինել միասնական, մեր ձայնը լսելի դարձնելու համայն աշխարհին եւ զօրաւիգ լինել Արցախի մեր հայրենակիցներին»:
ՍԴՀԿ Հայաստանի Վարիչ Մարմին