Հայաստանին օգնութիւն ցուցաբերելու միջոցառումներու մասին ՀԱՊԿ Անվտանգութեան Խորհուրդի որոշման նախագիծը պէտք է ստորագրել: Այս մասին յայտարարած է ՀԱՊԿ գլխաւոր քարտուղար Սթանիսլաւ Զասը` Մոսկուայի մէջ կայացած Հաւաքական Անվտանգութեան Պայմանագրի Կազմակերպութեան Խորհրդարանական Վեհաժողովի Խորհուրդի համատեղ նիստին:
«Պետութիւններու ղեկավարներուն յանձնարարութեամբ Հայաստան ուղարկուած է վերահսկողական առաքելութիւն` ՀԱՊԿ գլխաւոր քարտուղարին եւ շտաբի պետին գլխաւորութեամբ: Այդ աշխատանքին շնորհիւ մշակուած է Հաւաքական Անվտանգութեան Խորհուրդի որոշման նախագիծը Հայաստանի Հանրապետութեան օգնութիւն ցուցաբերելու համատեղ միջոցառումներու մասին, որ քննարկուած է Անվտանգութեան Խորհուրդի Նոյեմբեր 23-ի նստաշրջանին: ՀԱՊԿ պետութիւններու տարբեր դիրքորոշումներու պատճառով այդ նախագիծը կարելի չեղաւ ընդունիլ:
«Յոյսով եմ, որ որոշակի լրամշակումէ յետոյ կը հասնինք այս որոշման նախագիծի ստորագրման եւ համապատասխան միջոցներու ձեռնարկման: Վստահ եմ, որ այդ անհրաժեշտ է, այդ շարքին՝ Հայաստանի համար», ընդգծած է Զաս:
Զաս ընդգծած է, որ հայ-ատրպէյճանական սահմանին իրավիճակը կը շարունակէ մնալ ծանր: Անոր խօսքով` չնայած ՀԱՊԿ անդամ երկիրներու անհամապատասխան գնահատականներուն տարածաշրջանին մէջ տիրող իրավիճակին վերաբերեալ, բոլոր պետութիւնները համաձայն են, որ ներկայ պայմաններուն մէջ Հայաստան կը բախի վտանգներու եւ սպառնալիքներու:
«Այդ իսկ պատճառով մշակուած է Հայաստանին օգնութիւն ցուցաբերելու վեց կէտնոց միջոցառումներու համալիր, որ հաւանութեան արժանացած է բոլոր պետութիւններուն կողմէ, սա միջոցառումներու բաւականին ծանրակշիռ փաթեթ է», պարզաբանած է կազմակերպութեան գլխաւոր քարտուղարը:
