Մինչ Ատրպէյճանի արտաքին գործերու նախարարը ՄԱԿ-ի մէջ միջազգային գործընկերներուն հետ հանդիպումներուն կը խօսի խաղաղութեան երթալու Պաքուի պատրաստակամութեան մասին, երկրին նախագահը կրկին կը սպառնայ Հայաստանին: Իլհամ Ալիեւը Լաչինի մէջ Հայաստանը զգուշացուցած է սադրանքներու չդիմել, այլապէս «արժանի պատասխան պիտի տան»:
«Այսօր Հայաստանը պէտք է լաւ մտածէ: Ոչ ոք մեզի հետ վերջնագրերով կրնայ խօսիլ, եւ թող ոեւէ մէկուն վրայ յոյս չդնեն: Ես մէկ անգամ եւս կ’ուզեմ ըսել, մեզ ոչ ոք եւ ոչինչ կրնայ կանգնեցնել: Մենք իրաւունքի, արդարութեան, միջազգային իրաւունքի կողմնակից ենք, կը պաշտպանենք, պաշտպանած ու վերականգնած ենք մեր տարածքային ամբողջականութիւնը: Ամբողջ աշխարհին ցոյց տուած ենք, թէ ինչի ընդունակ ենք, մենք ուժով ազատագրեցինք մեր հողը եւ կը հպարտանանք անով: Սեպտեմբեր 13-ին, երբ մեր դէմ հերթական սադրանքը իրականացուեցաւ, ատրպէյճանական բանակը պատասխանեց ու թշնամիին իր տեղը դրաւ: Ես յոյսով եմ, որ սա վերջապէս դաս պիտի ըլլայ անոնց: Քանի որ տեսան, որ մեզի ոչ ոք եւ ոչինչ կը կանգնեցնէ: Ոչ մէկուն զանգը, ոչ մէկ յայտարարութիւն, նախաձեռնութիւն մեզ կը կանգնեցնէ: Մենք մեր հողին վրայ ենք ու մեր հողը կը պաշտպանենք», յայտարարած է Ալիեւը:
Ատրպէյճանի նախագահը պնդած է, որ Հայաստանը խաղաղութիւն չ’ուզեր եւ վրէժխնդրական միտքեր ունի: Ան դժգոհած է, թէ պաշտօնական Երեւանը գրեթէ մէկ տարիէ կը ձգձգէ սահմաններու սահմանազատման գործընթացը, իսկ հիմա այն պարզապէս պաշտօնական բնոյթ կը կրէ, եւ որեւէ էական բան, քարտէզներու մասին քննարկումներ չկան:
Ատրպէյճանի նախագահը ըսած է, որ ատրպէյճանական կողմը 20-րդ դարի եւ նախորդ ժամանակաշրջանի քարտէզներ ունի, եւ անոնց հիման վրայ պէտք է սահմանազատման աշխատանքներ տարուին: Թէ ի՞նչ քարտէզներ են ու արդեօք Հայաստանը կ’ընդունի՞ զանոնք, Ալիեւը չէ մանրամասնած: Անցեալ տարի Ռուսիոյ նախագահը առաջարկած էր սահմանազատումը իրականացնել ռուսական բանակի գլխաւոր շտաբին մէջ պահուող քարտէզներով, սակայն մինչ օրս ալ յայտնի չէ, թէ որ թուականի քարտէզը հիմք պիտի ընդունուի սահմանազատման համար:
«Եթէ Հայաստանը կ’ուզէ մեզ մեղադրել, թէ մենք իրենց տարածք ներխուժած ենք, այդ որեւէ հիմնաւորում չունի: Նախ եւ առաջ, եթէ սահմանները ըլլային այնտեղ, ուր իրենք կ’ըսեն, ապա սահմանային ճարտարապետական աշխատանքներ կը տարուէին: Անոնք կը կարծէին, թէ ամբողջ Ղարաբաղն ու Զանգեզուրը իրենց պիտի մնայ: Այդ պատճառով ալ որեւէ բան չեն ըրած հայ-ատրպէյճանական սահմանին», պնդած է Ալիեւ:
Ատրպէյճանի նախագահը նաեւ խօսած է Հայաստանին առաջարկուած խաղաղութեան պայմանագրին մասին` նշելով, որ անոր համար Պաքուն Երեւանին ներկայացուցած է 5 սկզբունք, Հայաստանը զանոնք բանաւոր ընդունած է, բայց գործնականին մէջ ոչինչ կը կատարուի` ժամանակ երակարաձգելով:
«Նոյեմբեր 9-ի անձնատուութեան համաձայն, Հայաստանը պէտք է դուրս բերէր իր զինուած ուժերը Ղարաբաղէն: Դեռ ամբողջութեամբ դուրս չեն բերուած: Հայաստանը պէտք է Ատրպէյճանը Նախիջեւանին կապող միջանցք տրամադրէր: Մինչ օրս ոչ միայն չեն տուած միջանցք, նոյնիսկ անոր երթուղին մեզի չեն ըսած: Գործնական որեւէ քայլ չեն ըրած», յայտարարած է Ալիեւ` յաւելելով, որ Ատրպէյճանը մինչեւ յաջորդ տարեվերջ Հայաստանի սահման տանող երկաթուղային եւ մայրուղիի ճանապարհներու կառուցումը պիտի աւարտէ, այնինչ, անոր խօսքով, հայկական կողմը ոչինչ կատարուած է եւ կարծես չեն ալ ուզեր ընել:
Պաշտօնական Երեւանը բազմիցս յայտարարած է, որ դուրս բերած է իր զինուած ստորաբաժանումները Արցախէն, իսկ եռակողմ յայտարարութիւնով ամրագրուած միակ միջանցքը Լաչինի միջանցքն է, Հայաստանը չի պատրաստուիր իր ինքնիշխան տարածքին Ատրպէյճանին միջանցք տրամադրելու:
