Անգարան տակաւին Երեւանի կողմէ յստակ քայլեր չէ տեսած: Այս մասին ըսած է Թուրքիոյ Արտաքին Գործերու Նախարարութեան ղեկավար Մեւլութ Չաւուշօղլուն` խօսելով հայ-թրքական յարաբերութիւններու կարգաւորման գործընթացին մասին:
Յիշեցնելով բանակցութիւններուն եւ Ատրպէյճանի ու Հայաստանի միջեւ պայմանաւորուածութիւններուն մասին` Չաւուշօղլուն ընդգծած է, որ «միջին միջանցքը» նոյնպէս նշանակութիւն ձեռք բերած է, քանի որ ռուս-ուքրանական պատերազմը սկսելով ապրանքները չեն կրցած հասնիլ Արեւմուտք Ռուսիայով: Չաւուշօղլուն ըսած է, որ Անգարայի եւ Պաքուի մտադրութիւնները «անկեղծ» են: «Մենք կը փափաքինք գործով տեսնել, թէ որքանով անկեղծ է Հայաստանը: Առայժմ կան տեղեկութիւններ եւ յայտարարութիւններ: Կայ նաեւ ճնշում, այդ ճիշդ է: Սփիւռքը դուրսէն, ծայրայեղականներու խումբը` ներսէն: Մենք կը փափաքինք տեսնել, թէ որքանով անկեղծ է Հայաստանը: Մենք այդ յստակ քայլերը տակաւին չենք տեսած: Այլ նախագիծերու մէջ, այդ շարքին Զանգեզուրի նախագիծին կամ համապարփակ խաղաղութեան համաձայնագրին մէջ… Հայաստանի իշխանութիւնները, Նիկոլ Փաշինեանի կառավարութիւնը պէտք է դրական քայլերու ձեռնարկեն այս հարցերուն մէջ խաղաղութեան համար: Խօսքերը բաւարար չեն»:
Ան նաեւ ընդգծած է, որ Անգարան կ’իրականացնէ հայ-թրքական յարաբերութիւններու կարգաւորման գործընթաց Ատրպէյճանի հետ համակարգմամբ: «Քայլերը, որոնք պիտի ձեռնարկուին տարածաշրջանին մէջ, օգուտ պիտի բերեն բոլորին: Մենք կը սպասենք Հայաստանէն յստակ քայլեր այս առումով»: