Երեւանի մէջ տեղի ունեցեած է «Հայաստան» համահայկական հիմնադրամի Հոգաբարձուներու Խորհուրդի 31-րդ նիստը, որուն մասնակցած են վարչապետ Նիկոլ Փաշինեանը, ՀՀ-ի նախագահ, «Հայաստան» համահայկական հիմնադրամի Հոգաբարձուներու Խորհուրդի նախագահ Վահագն Խաչատուրեանը, Արցախի նախագահ Արայիկ Յարութիւնեանը եւ այլք:
Վահագն Խաչատուրեանը իր խօսքին մէջ նշած է, որ հիմնադրամի խորհուրդի անդամներն ու ամբողջ աշխատակազմը ջանք ու եռանդ պէտք է չխնայեն, որպէսզի այն զերծ ըլլայ որեւէ քաղաքական շահարկումէ կամ կասկածներէ, ընդգծելով որ Հիմնադրամին համահայկական ընդգրկումը ինքնին կը բացառէ որեւէ քաղաքական միտում, նախընտրութիւն կամ ազդեցութիւն:
«Նաեւ այս պատճառով բոլորս պէտք է երաշխաւորենք հիմնադրամի թափանցիկ, հաշուետու եւ հրապարակային աշխատելաոճը: Այս նպատակի կեանքի կոչման համար ես նաեւ ակնկալում եմ, որ մինչեւ ընթացիկ ամսուայ վերջ պատրաստ կը լինեն Հայաստանի Հանրապետութեան Հաշուեքննիչ պալատի համապատասխան ուսումնասիրութիւնների արդիւնքները», նշած է նախագահը:
««Հայաստան» համահայկական հիմնադրամն իրաւամբ համահայկական այն կառոյցն է, որը գուցէ թէ չունի նմանօրինակը` ոչ իր բովանադակութեամբ, ոչ էլ կազմակերպական ձեւով, ու նաեւ այս պատճառով է, որ իւրաքանչիւրիս եւ մասնաւորապէս Հոգաբարձուների Խորհրդի անդամների ամէնօրեայ աշխատանքը պէտք է միտուած լինի հիմնադրամի հանրահռչակմանը, նրա վարկանիշն ու առաքելութիւնը անբասիր պահելուն», նաեւ ընդգծած է Վահագն Խաչատուրեանը:
Արցախի նախագահի աշխատակազմէն կը հաղորդեն, որ ելոյթով հանդէս եկած է Արայիկ Յարութիւնեանը: Ան իր խօսքին մէջ բարձր գնահատած է Հիմնադրամին գործունէութիւնը, ընդգծելով որ համայն հայութեան ջանքերուն շնորհիւ Արցախի մէջ կ’իրականացուին մեծածաւալ բնակարանաշինական աշխատանքներ, որուն արդիւնքով հազարաւոր տեղահանուած ընտանիքներ պիտի ապահովուին բնակարաններով:
Նիստին ընթացքին հիմնադրամի գործադիր տնօրէն Հայկակ Արշամեան ներկայացուցած է հիմնադրամի 2021 թուականի գործունէութեան հաշուետուութիւնը:
2021 թուականի Նոյեմբերին տեղի ունեցած «Կենսունակ սահմանային համայնքներ» խորագրով «Հայաստան» համահայկական հիմնադրամի հեռուստամարաթօնին հաւաքուած էր 12 միլիոն 351 հազար տոլար:
Այս տարի կը լրանայ «Հայաստան» համահայկական հիմնադրամին 30-ամեակը: