Եթէ հայկական կողմը շարունակէ բարձրացնել Լեռնային Ղարաբաղի կարգավիճակի հարցը, այդ կրնայ յանգեցնել նոր առճակատման, յայտարարած է Ատրպէյճանի նախագահը` պնդելով, որ կարգավիճակի մասին չխօսելու բանաւոր պայմանաւորուածութիւն կայ, եւ Հայաստանի կառավարութեան կոչ ընելով հրաժարելու Ատրպէյճանին ուղղուած որեւէ տարածքային պահանջէ:
Այս յայտարարութիւնները Ալիեւ կատարած է Պաքուի Համաշխարհային իններորդ համագումարի բացման ժամանակ` վտանգաւոր ու ապակառուցողական համարելով Լեռնային Ղարաբաղի կարգավիճակին մասին Հայաստանէն հնչող յայտարարութիւնները:
Ան վերստին պնդած է, որ Ատրպէյճանի կազմին մէջ նման վարչատարածքային միաւոր գոյութիւն չունի. «Հայաստանի կառավարութիւնը պէտք է գիտակցի սա եւ հրաժարի պատմութիւնը խմբագրելու փորձերէն: Պատմութիւնը արդէն գրուած է, եւ այսպէս ըսած բանաւոր համաձայնութիւն կայացուած է, որ ոչ ոք պիտի չխօսի կարգավիճակի մասին: Ցաւօք, այդ մասին կը խօսուի, ինչ որ կրնայ բերել շատ լուրջ հետեւանքներու: Եթէ Հայաստանը շարունակէ կասկածի տակ դնել Ատրպէյճանի տարածքային ամբողջականութիւնը, ապա Ատրպէյճանը այլ ելք չ’ունենար, քան ընել նոյնը»:
Յիշատակելով Եւրոպական Խորհուրդի նախագահ Շարլ Միշէլի պրիւքսէլեան յայտարարութիւնը` Ալիեւը խօսած է Ղարաբաղի հայերու անվտանգութեան եւ իրաւունքներուն մասին` հաւատացնելով, որ անոնք լիովին պաշտպանուած պիտի ըլլան. «Ատրպէյճանը բազմազգ երկիր է, եւ հայ բնակչութիւնը ամենամեծ ցեղային փոքրամասնութիւնը չէ: Այդ պատճառով մեր սահմանադրութիւնը հաւասար իրաւունքներ կ’ապահովէ բոլոր ազգերւն, այդ շարքին՝ Ատրպէյճանի մէջ ապրող հայերուն համար: Ի հարկէ, մենք հոգ պիտի տանինք անոնց իրաւունքներուն եւ անվտանգութեան համար»:
Ատրպէյճանի նախագահը կրկին յայտարարած է, որ Զանգեզուրը պատմական ատրպէյճանական տարածք եղած է, որ սովետական իշխանութիւնները 1920-ին Հայաստանին փոխանցած են: Սպառնացած է, որ եթէ Հայաստանը Ղարաբաղի հայերուն համար կարգավիճակ պահանջէ, ապա Ատրպէյճանն ալ նոյնը պիտի պահանջէ Արեւմտեան Զանգեզուրի ատրպէյճանցիներուն համար:
Պաշտօնական Երեւանը բազմիցս յայտարարած է, որ Ատրպէյճանէն տարածքային պահանջներ չունի, եւ խաղաղութեան բանակցութիւններուն համար առաջարկած է դիտարկել Ղարաբաղի վերջնական կարգավիճակին հարցը: Այնուհանդերձ, Մայիսին Պրիւքսէլի մէջ Փաշինեան-Ալիեւ վերջին բանակցութիւններէն յետոյ Եւրոպական Խորհուրդի նախագահին տարածած յայտարարութեան մէջ կարգավիճակի մասին որեւէ յիշատակում չկար:
Ասոր հակառակ Ատրպէյճանը, անոր խօսքով, կը կատարէ իր պարտաւորութիւնները` ապահովելով Հայաստանի անարգել կապը Ղարաբաղի հետ Լաչինի ճանապարհով. «Զանգեզուրի միջանցքի հարցին շուտափոյթ լուծումը ապագային տարածաշրջանային խաղաղութեան հաստատման հիմնարար տարրերէն է: Եթէ մեզի համար չապահովեն մուտք ու ելքը, ապա շատ դժուար պիտի ըլլայ խօսիլ խաղաղութեան մասին, եւ Հայաստանի հետ համակեցութեան, բարիդրացիական յարաբերութիւններու հաստատման ուղղուած Ատրպէյճանի ջանքերը ապարդիւն պիտի ըլլան»:
Պաշտօնական Երեւանը, սակայն, կը շարունակէ պնդել, որ միջանցքը իրեն համար կարմիր գիծ է, անոր շուրջ որեւէ պայմանաւորուածութիւն չկայ եւ խաղաղութեան պայմանագրի հիմքին պէտք է ըլլայ յարգանքը միմեանց տարածքային ամբողջականութեան նկատմամբ:
Ալիեւը այս անգամ ալ չէ մոռցած անցած 30 տարիներուն ղարաբաղեան կարգաւորմամբ զբաղուած ԵԱՀԿ Մինսքի խումբը ու վերստին յայտարարած է, որ Ատրպէյճանը լուծած է հակամարտութիւնը եւ այդ կառոյցին կարիքը այլեւս չկայ. «Ես կ’ուզեմ յայտնել մեր դիրքորոշումը` Հայաստանի կամ որեւէ այլ երկրի կողմէ Մինսքի խումբին վերաբերեալ որեւէ շահարկում կը ջղայնացնէ Ատրպէյճանին: Մենք լուծած ենք հակամարտութիւնը, Մինսքի խումբին մշակած Մատրիտեան սկզբունքները իրագործուած են: Հիմա մենք պէտք է մտածենք, թէ ինչպէս կարգաւորել յարաբերութիւնները Հայաստանի հետ եւ խաղաղութեան պայմանագիր ստորագրենք»:
Ատրպէյճանի նախագահին կանխատեսմամբ, եթէ կողմերը լաւ աշխատին, ապա հնարաւոր պիտի ըլլայ խաղաղութեան պայմանագիրը կնքել մէկ տարուան ընթացքին:
Հակառակ ամբողջ ելոյթի ընթացքին հնչած զգուշացումներուն ու սպառնալիքներուն, ան ընդգծած է, որ Երեւանը ընդունած է ապագայ պայմանագրի համար Պաքուի 5 սկզբունքները, եւ այժմ պէտք է յառաջ երթալ ու գործնական քայլեր կատարել: Աւելին, Ալիեւը տեղեկացուցած է, որ Ատրպէյճանը արդէն ձեւաւորած է խաղաղութեան պայմանագրի յանձնաժողովը եւ նոյնը կ’ակնկալէ Հայաստանէն:
Երեւանը նման յանձնաժողովի մասին պաշտօնապէս ոչինչ յայտնած է: Ալիեւն ալ յանձնաժողովի մասին այլ մանրամասնութիւններ չէ յայտնած:
