Ազգային Անվտանգութեան Ծառայութիւնը կը յայտնէ, որ օտարերկրեայ յատուկ ծառայութիւններու կողմէ Հայաստանի ու Արցախի մէջ ստեղծուած եւս մէկ գործակալական ցանց բացայայտած եւ չէզոքացուցած է: Ըստ հաղորդագրութեան` անոր մէջ ներգրաւուած եղած են զինուած ուժերու տարբեր ստորաբաժանումներու ծառայողներ, ինչպէս նաեւ նախկին զինուորներ եւ Արցախի պետական մարմիններու աշխատակիցներ:
Դէպքին առթիւ ԱԱԾ-ի մէջ յարուցուած է քրէական գործ, ըստ որուն` օտարերկրեայ յատուկ ծառայութիւններու աշխատակիցները ընկերային կայքերու մէջ տեղադրած են բարձր վարձատրութեամբ աշխատանքի վերաբերեալ գովազդային կեղծ յայտարարութիւններ` որպէս պայման առաջարկելով լրացնել աշխատանք փնտռողի անհատական եւ կենսագրական տուեալները, ապա առաջարկած են համագործակցիլ իրենց հետ եւ տեղեկութիւններ տրամադրել, այդ շարքին` Արցախի եւ Հայաստանի ռազմավարական նշանակութիւն ունեցող կառոյցներու, ռազմական սարքերու, զօրամասերու, սպառազինութեան, մարտական դիրքերու վերաբերեալ:
Ըստ ԱԱԾ-ի, որոշ պարագաներու մէջ հաւաքագրուած անձեր օտարերկրեայ յատուկ ծառայութիւններու հետ հանդիպած են երրորդ երկիրներու մէջ եւ ստացած են ծածկանուններ, յանձնած են պետական, ռազմական եւ ծառայողական գաղտնիք պարունակող փաստաթուղթեր:
Կը հաղորդուի, որ գործակալական այս ցանցին մէջ ընդգրկուած որոշ անձեր նախապէս տեղեկացուած եղած են Արցախի դէմ սպասուող պատերազմին եւ անոր յստակ օրուան մասին:
Պետական դաւաճանութիւն կատարելու կասկածանքով ձերբակալուած է 16 անձ, անոնցմէ 10-ն կալանաւորուած են:
