Home ԳԼԽԱՒՈՐ ԼՈՒՐԵՐ Թեհրանը Պատրաստ Է Աջակցիլ Երեւանին Իրան-Հայաստան Նոր Ճանապարհի Կառուցման Հարցով

Թեհրանը Պատրաստ Է Աջակցիլ Երեւանին Իրան-Հայաստան Նոր Ճանապարհի Կառուցման Հարցով

by MassisPost

«Պատրաստ ենք աջակցիլ Հայաստանին՝ Իրան-Հայաստան նոր՝ այլընտրաքային ճանապարհի կառուցման հարցով»։ Այս մասին ըսած է պաշտօնական այցով Հայաստան ժամանած Իրանի ճանապարհներու եւ քաղաքաշինութեան փոխ նախարար Խէյրուլլահ Խադըմին՝ «Իրան-Հայաստան Բարեկամութիւն» եութուպեան էջին տուած հարցազրոյցի ժամանակ։

«Իրանի կառավարութեան եւ ճանապարհներու ու քաղաքաշինութեան նախարարի որոշման համաձայն, Իրանէն երկրաչափական պատուիրակութիւնը, իմ գլխաւորութեամբ, Հայաստան ժամանած է։ Պատուիրակութեան նպատակն է Հայաստանի պատկան մարմիններու հետ ուսումնասիրել այն դժուարութիւնները, որոնք ստեղծուած են Գորիս-Կապան ճանապարհի ուղղութեամբ իրանական բեռնատարներուն համար։ Հայաստան այժմ ձեռնամուխ եղած է այլընտրանքային ճանապարհ կառուցել Տաթեւի շրջանի մէջ։ Մենք բանակցութիւններ կը վարենք հայկական կողմին հետ, որպէսզի բեռնափոխադրումները եւ ուղեւորական փոխադրումները որքան հնարաւոր է շուտ այդ ճանապարհով բնականոն հունի մէջ մտնեն», – ըսած է իրանցի փոխ նախարարը։

Խէյրուլլահ Խադըմին շեշտած է, որ Իրան-Հայաստան պետական ճանապարհը Իրանի համար ռազմավարական նշանակութիւն ունի։

«Մենք այցելած ենք այս ճանապարհ եւ պատրաստ ենք աջակցիլ Հայաստանին՝ նոր ճանապարհի կառուցման համար։ Իրանը պատրաստ է երկրաչափական իր հնարաւորութիւնները տրամադրել Հայաստանին», – ըսած է փոխ նախարարը՝ շարունակելով․ – «Հայաստանը նաեւ կը կառուցէ «Հիւսիս-Հարաւ» ճանապարհը, որ կը սկսի Իրանի սահմանէն եւ կը հասնի մինչեւ Վրաստանի սահման։ Ինչքան գիտեմ, հիւսիսային մասի մէջ մեծ գործ եղած է եւ յուսով եմ, որ հարաւային մասին մէջ ալ աշխատանքը շուտով կը մեկնարկէ։ Մենք պատրաստ ենք նաեւ այս կապակցութեամբ համագործակցիլ Հայաստանի հետ։ Իրանը մեծ փորձ ունի ճանապարհաշինութեան ոլորտին մէջ եւ մեր կապալառուները պատրաստ են իրենց փորձը տրամադրել Հայաստանին»,- ըսած է Իրանի ճանապարհներու եւ քաղաքաշինութեան փոխ նախարարը։

Հարակից Նյութեր

Leave a Comment