Home ԳԱՂՈՒԹԱՅԻՆ ՀՀ Գլխաւոր Հիւպատոս, Արտակարգ Եւ Լիազօր Դեսպան Արմէն Բայբուրդեանի Ուղերձը Անկախութեան Օրուայ Կապակցութեամբ

ՀՀ Գլխաւոր Հիւպատոս, Արտակարգ Եւ Լիազօր Դեսպան Արմէն Բայբուրդեանի Ուղերձը Անկախութեան Օրուայ Կապակցութեամբ

by MassisPost

Յարգելի հայրենակիցներ, սիրելի եղբայրներ եւ քոյրեր, ջերմօրէն շնորհաւորում եմ բոլորիս Անկախութեան օրուայ կապակցութեամբ։

30 տարի առաջ այս օրը հայ ժողովուրդը հռչակեց իր անկախ պետականութիւնը: Մեր տօնացոյցի այս կարեւոր օրը խորհրդանշում է մեր ժողովրդի՝ անկախ եւ ժողովրդավարական երկիր կառուցելու հաւաքական կամքը, որն արտայայտուեց եւ ամրագրուեց 1991 թուականի սեպտեմբերի 21-ի հանրաքուէով։

Անկախ պետականութիւն ունենալու ձգտումը դարեր շարունակ եղել է հայ ժողովրդի բոլոր սերունդների մեծագոյն իղձն ու ձգտումների կիզակէտը: Մեր նախահայրերը իրենց դարաւոր պայքարով մշտապէս վառ են պահել ազատ եւ անկախ ապրելու վեհ գաղափարները մեր ինքնագիտակցութեան մէջ: Հենուելով ազգային եւ համամարդկային արժեգների լաւագոյնն համադրման վրայ, ցուցաբերելով ան կոտրում կամք եւ հանդէս գալով որպէս իրապէս միասնական ուժ՝ հայ ժողովրդի դարերի խորքից եկող ազգային ազատագրական պայքարը վերստին պսակուեց հաջողութեամբ 1991 թուականին եւ ի լուր աշխարհի հռչակեց Հայաստանի անկախ պետականութեան վերականգնման մասին: Մեր բոլորիս հպարտութեանը չափ չկար, երբ որ նորանկախ Հայաստանի Հանրապետութիւնը դարձաւ միջազգային հանրութեան լիարժէք անդամ՝ 1992 թուականի մարտի 2-ին անդամակցելով Միաւորած Ազգերի Կազմակերպութեանը։ Ես պատիւն եմ ունեցել աշխատելու ՄԱԿ-ում որպէս նորանկախ Հայաստանի հայ դիւանագէտ եւ պէտք է ձեզ խոստովանեմ, որ մեծագոյն բերկրանք է, ինչպէս նաեւ ահռելի պատասխանատուութիւն ծառայելը մեր հայրենի պետութեանը միջազգային այդ ամենահեղինակաւոր կազմակերպութիւնում։

Անկախութեան հաստատումից ի վեր մեր երեք տասնամեակի պատմութիւնը լիքն է պետականաշինութեան կարեւորագոյն ձեռքբերումներով, ինչպէս նաեւ  բազում փորձութիւններով, որոնք յաղթահարուեցին ժողովրդի հաւաքական իմաստնութեան ու ժամանակակից աշխարհին համահունչ քայլելու մեր ձգտումների շնորհիւ։ Այսօր էլ մենք բոլորս միասնաբար պէտք է յաղթահարենք մեր հայրենիքի առաջ ծառացած ահռելի անվտանգային մարտահրաւէրները՝ հայրենի պետութեան շահը ամեն ինչից վեր դասելով։ Ինքնիշխանութիւնը, համահայկականութիւնը եւ Հայաստանի, Արցախի ու Սփիւռքի միասնականութիւնն են այն կարեւոր հենասիւները, որոնք հնարաւորութիւն կընձեռնեն այս փորձութիւնները պատուով անցեալի գիրկն ուղարկելու եւ մեր մէջքը՝ իբրեւ դարերի խորքից եկող ու դէպի դարեր գնացող ազգ շտկելու համար։

Շնորհաւորելով բոլորիս այս կարեւոր տօնի առթիւ՝ մենք նախեւառաջ մեր յարգանքի տուրքը պէտք է մատուցենք անկախութեան համար իրենց կեանքը զոհաբերած հերոսներին, արժեւորենք անկախութեան խորհուրդը, խորհենք մի պահ մեր միասնականութեան կարեւորութեան մասին, ինչպէս նաեւ գլուխ խոնարհենք մեր նորորեայ հերոսների յիշատակի առջեւ, որոնք իրենց արիւնով ներկեցին հայրենի հողը՝ յանուն հայ ժողովրդի լաւ ապագայի։ Հենց այսօր եւս մէկ անգամ պէտք է գիտակցենք, որ անկախ պետութիւնը մի ժառանգութիւն է, որը մշտապէս պէտք է շարունակել ամրապնդել եւ զարգացնել։ Գիտակցելով, որ ապագայ տարիների ձեռքբերումները հեշտ չեն տրուելու՝ այսօր մեզնից իւրաքանչիւրի պարտքն է՝ մտորել՝ ինչ կարող ենք ամեն մէկս անել մեր բոլորի սերունդների ապագան աւելի ապահով, իսկ հայրենիքը՝ աւելի անսասան ու ամուր դարձնելու համար։

Ես յարգանքի իմ տուրքն եմ մատուցում եւ խորին երախտագիտութիւնս յայտնում մեր Քալիֆորնիահայերին, Նեւատա, Վաշինգտոն, Օրեգոն, Արիզոնա, Եութա, Գոլորատօ եւ միւս բոլոր նահանգների հայրենակիցներիս, որոնք անցեալ տարուայ Արցախեան պատերազմի ծանրագոյն շրջանում իրենց անմնացորդ նուիրումով ու դրսեւորած ջանքերով ապացուցեցին, որ իրենց հայրենասիրութիւնը սահման չունի։ Դուք բոլորդ հայրենիքի անբաժան մասն էք։ Աշխարհագրական հեռաւորութիւնն երբեք չի կարող բաժանել մեր հայութեանը Մայր Հայրենիքից։

Շնորհաւորում եմ Քալիֆորնիահայ եւ ամբողջ Արեւմտեան Միացեալ Նահանգների հայրենակիցներիս՝ Հայաստանի Հանրապետութեան անկախութեան տարեդարձի առթիւ։ Շնորհաւորում եմ նաեւ ամերիկացի մեր բազում բարեկամներին, որոնք Միացեալ Նահանգների անունից կամ անձնապէս իրենց ծանրակշիռ աւանդն են ներդրել հայոց անկախ պետականութեան ամրապնդման գործում։

Կեցցէ Հայաստանը, կեցցէ Արցախը, կեցցէ հայկական Սփիւռքը։

 

Հարակից Նյութեր

Leave a Comment