Կառավարութեան այսօրուայ՝ Օգոստոս 18-ի նիստին կառավարութեան գործունէութեան 2021-2026 թուականներու գործունէութեան ծրագրի ներկայացման ժամանակ վարչապետ՝ Նիկոլ Փաշինեան անդրադարձաւ սահմանադրական փոփոխութիւններու հարցին։
«Նախկինում մենք արտայայտել ենք դիրքորոշումներ սահմանադրական փոփոխութիւնների վերաբերեալ, բայց 44-օրեայ պատերազմը նոր խթան տուեց սահմանադրական փոփոխութիւնների հետ կապուած հարցին։ Եւ հարց բարձրացուեց, թէ ինչքանով է կառավարման այն համակարգը, որը մենք ունենք, համապատասխան մեր երկրում առկայ մարտահրաւէրներին։ Ի հարկէ, Քաղաքացիական պայմանագիր կուսակցութիւնն այս առումով նախկինում արտայայտել էր դիրքորոշում, բայց մենք նաեւ հաշուի առնելով մեր ծրագրի նախաբանում առկայ այն դրոյթները, որ մեր խնդիրն է ընդհանուր առմամբ աւելի ուշադիր լինել քաղաքական, հանրային շրջանակներից հնչող տարբեր առաջարկներին, մենք ծրագրում սահմանադրական փոփոխութիւնների թեման ձեւակերպել ենք որպէս բաց քննարկման հնարաւորութիւն»,- ըսաւ վարչապետը։
Ըստ Փաշինեանին՝ ծրագրին մէջ որեւէ կանխավարկած չէ դրուած, կանխավարկածը այն է, որ պէտք է քաղաքական, հանրային տարբեր շրջանակներու հետ կատարուին քննարկումներ։ «Ի հարկէ, այստեղ շատ կարեւոր է լինելու իշխող քաղաքական ուժի դիրքորոշումը՝ որպէս ժողովրդի վստահութեան քուէն ստացած քաղաքական ուժ։ Բայց նաեւ պէտք է ասեմ, որ իշխող քաղաքական ուժի դիրքորոշումը միակ գործօնը չպէտք է լինի, որը կ’ազդի այս որոշման վրայ։ Այն, որ սահմանադրական կառուցակարգերի մէջ մենք ունենք խնդիրներ, ականատես եղանք նաեւ վերջին 7-8 ամիսների ընթացքում։ Ես ուզում եմ ամենապարզ ու ակնյայտ օրինակը բերել՝ երբ երկրում առկայ էր ռազմական յեղաշրջման վտանգ, այդ իրավիճակը կարգաբերելու համար աւելի քան մէկ ամիս ժամանակ պահանջուեց։ Իսկ այս ընթացքում թէ ինչ տեղի ունեցաւ եւ ինչ տեղի չունեցաւ, որը հետագայում ինչպէս ազդեց մեր երկրի անվտանգային միջավայրի վրայ, ցաւօք սրտի, մենք դա տեսանք արդէն Մայիս ամսուայ ընթացքում։ Ես կարծում եմ, որ ռազմական դրութեան պայմաններում իրավիճակն արագ կարգաբերելու հնարաւորութիւնն այն ակնյայտ խնդիրն է, որը կայ մեր սահմանադրական կարգաւորումներում։ Բայց սա նշանակո՞ւմ է, որ մենք ընդհանուր առմամբ պէտք է գնանք կառավարման համակարգի փոփոխութեան, թէ չի նշանակում, այդ հարցի պատասխանը երեւի պէտք է գտնել աւելի մանրամասն քննարկումների միջոցով։ Այստեղ պատրաստ պէտք է լինենք, որ հանրային համաձայնութիւն չի ձեւաւորուելու, լինելու են տարբեր կարծիքներ, եւ մենք պէտք է կարողանանք գնալ ամենատրամաբանական լուծումներին»,- ըսաւ Փաշինեան։
