Յայտարարութիւնը հնչած է երէկ՝ Օգոստոս 5-ին Անգարայի մէջ Ազգային անվտանգութեան խորհուրդի նիստէ յետոյ, որ անցած է նախագահ Ռէճէպ Էրտողանի գլխաւորութեամբ:
Ըստ տեղական լրատուամիջոցներուն, դռնփակ հանդիպումը շարունակուած է աւելի քան երեք ու կէս ժամ, աւարտին Ազգային անվտանգութեան խորհուրդը վեց կէտնոց յայտարարութիւն տարածած է, որոնցմէ մէկը կը վերաբերի պաշտօնական Երեւանին:
«Հայաստանը պէտք է զերծ մնայ յարձակողական հռետորաբանութենէ ու քայլերէ եւ օգտագործէ կայունութիւն եւ խաղաղութիւն հաստատելու հնարաւորութիւնը, որ ստեղծուած է Հարաւային Կովկասի մէջ տեւական դադարէն յետոյ», – յայտարարած է պաշտօնական Անգարան:
Բացի այդ, Թուրքիան նաեւ կոչ ըրած է Հայաստանին զարգացնելու համագործակցութիւնը տարածաշրջանի երկիրներուն հետ` հաւատարիմ մնալով ստանձնած պարտաւորութիւններուն:
Յայտարարութիւնը չի յստակեցներ, թէ ո՞ր պարտաւորութիւններուն մասին է խօսքը եւ արդեօք տարածաշրջանի երկիրներու հետ համագործակցութիւնը զարգացնելու շրջածիրէն ներս նաեւ հայ-թրքական յարաբերութիւններու կարգաւորումը կը դիտարկուի:
Աւելի վաղ` այս տարեսկիզբին, Թուրքիոյ արտաքին գործոց նախարար՝ Մեւլութ Չաւուշօղլուն խօսած էր Նոյեմբեր 9-ի եռակողմ յայտարարութեան, մասնաւորապէս` հաղորդակցութեան ուղիներու, Հայաստանի տարածքով դէպի Նախիջեւան ճանապարհը բանալու մասին, ինչ որ հնարաւորութիւն կու տայ Թուրքիոյ ուղիղ կապ հաստատել Ատրպէյճանի հետ: