Զանգեզուրի պղնձամոլիպտենային գործարանի (ԶՊՄԿ) գլխաւոր տնօրէն՝ Փարագ Եոհաննէս Պհատի հրամանով աշխատանքէն ազատուած են 38 հոգի։ Ազատուողներու ցանկին մէջ են արտադրամասի պետեր, անվտանգութեան բաժիններու ղեկավարն ու աշխատակիցները, ելեկտրականութեան աշխատակիցներ, վարչական աշխատողներ՝ խորհրդականներ եւ օգնականներ։ Ազատուած է նաեւ ընկերութեան խորհուրդի նախագահի խորհրդական՝ Գառնիկ Ղազարեան (յայտնի է որպէս «Աժդանակ»–ի Գարիկ), որ ըստ տեղեկութիւններուն, մէկ ամիսով երէկ կալանաւորուած է։
Աղբիւրը հաղորդած է նաեւ, որ աշխատանքէն ազատուողները ԶՊՄԿ–ի գլխաւոր նախկին տնօրէն, Սիւնիքի նախկին մարզպետ՝ Վահէ Յակոբեանի մտերիմներն են։ «Կարելի է ասել, աշխատանքից ազատուողները նրանք են, որոնք միւս աշխատակիցներին ճնշել են ընտրութեան հարցում, նրանք, ովքեր վարչապետի ճամբան էին փակել»:
Aravot.am-ը փորձած է աշխատանքէն ազատուողներէն պարզել, թէ ինչ պատճառով ազատուած են աշխատանքէն, սակայն անոնք առայժմ զերծ մնացած են մեկնաբանութիւններէն, ոմանք ըսած են, որ պիտի դիմեն դատարան։
Ի դէպ, յիշեցնենք, որ Սիւնիքի մէջ նախընտրական քարոզարշաւի ժամանակ ՀՀ վարչապետի պաշտօնակատար՝ Նիկոլ Փաշինեան յայտարարած էր, որ մինչեւ Յուլիս 15-ը ԶՊՄԿ-ի մէջ փոփոխութիւններ տեղի պիտի ունենան։ «Նրանք ովքեր մարդկանց սպառնում են աշխատանքից ազատուել, իրենք չեն աշխատելու»,–ըսած էր Փաշինեան։
