Սոցիալ Դեմոկրատ Հնչակեան Կուսակցութեան Կեդրոնական Վարչութեան ատենապետ ընկ. Համբիկ Սարաֆեան համաձայն չէ, թէ 44-օրեայ պատերազմէն ետք կապը խզուած է հայրենիքի եւ Սփիւռքի միջեւ: «Ընդհակառակը, այսօր պէտք է աւելի օժանդակենք հայրենիքին, որ կը գտնուի շրջադարձային ժամանակահատուածի մէջ:
«Առաջին լրատուականին» տրուած ուղիղ հարցազրոյցի մը մէջ Ընկ. Սարաֆեան Սփիւռքի առաջնահերթ հարց համարեց Հայաստանի անվտանգութեան եւ Արցախի կարգավիճակի ապահովումը: Ան պատմական սխալ համարեց մնայուն այն տպաւորութիւնը, թէ Ռուսիան երբեք չի հեռանար տարածաշրջանէն:
«Բոլոր երկիրները կ’ունենան այլընտրանքային ծրագիրներ: Մենք սակայն մէկ ծրագիր ունէինք եւ համոզուած էինք, որ ռուսերը մեզի անպայման պիտի օգնեն, նոյնիսկ եթէ այդ չի բխիր իրենց տարածաշրջանային շահերէն», ըսաւ ընկ. Սարաֆեան:
Ան անհասկնալի համարեց հայկական ինքնիշխանութենէն հրաժարելու մասին ոմանց կոչերը, զանոնք որակելով ոչ թէ ազգային դիրքորոշում, այլ Մոսկուային հաճոյանալու փորձեր:
Ընկ. Սարաֆեան նշեց, որ երբ Ատրպէյճան անցնող 10 տարիներուն սպառազինութեան մրցավազքի մէջ էր, մեր պետական այրերը կը համոզէին ժողովուրդին, որ մենք համաչափ զէնք կը ստանանք Ռուսիայէն, սակայն պարզուեցաւ որ այդպէս չէ: «Անկախութիւնը կարելի չէ սակարկել, այլ պէտք է մենք ըլլանք մեր երկրին տէրը, մեր որոշումները բխին մեր պետական, ոչ թէ ուրիշներու շահերէն», ըսաւ ընկ. Սարաֆեան եւ յիշեցուց, թէ 30 տարի չկրցանք պետական մտածողութիւն եւ մշակոյթ ձեւաւորել Հայաստանի մէջ:
«Աւելի առաջնորդուեցանք զգացական նկատառումներով, քան մեր շահերով: Մենք պէտք է սկսինք խօսիլ Թուրքիոյ հետ, գոնէ հասկնալու երկու կողմերուն ակնկալիքները, առանց միջնորդի», եզրափակեց ընկ. Սարաֆեան: