«Լեւատա կեդրոնը» պարզած է ռուսաստանցիներու վերաբերմունքը արտասահմանեան երկիրներու հանդէպ։ Ընկերաբանութեան ծառայութիւնը հարց-պատասխան կատարած է, որու ժամանակ հարցման մասնակիցներուն առաջարկուած է նշել այն երկիրները, որոնք, անոնց կարծիքով, Ռուսաստանին բարեկամ կամ թշնամի են։ Օգոստոս 20-26-ին կատարուած հարցման մասնակցած են 50 տարածաշրջաններու 137 բնակավայրերու բնակիչները: 1601 հարցուողներու մէջ կան քաղաքաբնակներու եւ գիւղաբնակներու ներկայացուցիչներ։
Երկիրներու ցանկին առաջին հնգեակին մէջ, զորս ռուսաստանցիները կը համարեն ՌԴ-ի բարեկամներ եւ դաշնակիցներ, յայտնուած են Պելառուսիան (58 տոկոս), Չինաստանը (40 տոկոս), Ղազախստանը (35 տոկոս), Հայաստանը (17 տոկոս) եւ Ատրպէյճանը (15 տոկոս)։ Յաջորդած են Հնդկաստանը (13 տոկոս), Սուրիան (12 տոկոս) եւ Վենեզուելան (11 տոկոս)։
Ռուսաստանի հանդէպ առաւել ոչ բարեկամական եւ թշնամական երկիրներու ցուցակի առաջին 5-ին մէջ մտած են ԱՄՆ-ը (60 տոկոս), Ուքրանիան (35 տոկոս), Մեծ Բրիտանիան (29 տոկոս), Լաթվիան, Լիթուանիան եւ Լեհաստանը (26-ական տոկոս)։ Լեհաստանին յաջորդած է Վրաստանը (16 տոկոս), Գերմանիան (15 տոկոս) եւ Էսթոնիան (11 տոկոս)։
Նշենք, որ 2019 թուականին, հարցուողներուն 22 տոկոսը Հայաստանը կը համարէր բարեկամ եւ դաշնակից երկիր։
