Քալիֆորնիայում եւ ԱՄՆ Արեւմտեան միւս նահանգներում բնակուող յարգելի հայրենակիցներ,
Հայ-ատրպէյճանական սահմանին ատրպէյճանական կողմի յարձակումներն ու զաւթողական նկրտումները վերջին շրջանում տարածում ստացան նաեւ աշխարհի մի շարք երկրներում, որտեղ հայահոծ համայնք կայ։ Յատկապէս Քալիֆորնիան այդ իմաստով ատրպէյճանական սադրանքների թիրախաւորման գլխաւոր նշանակէտներից մէկն է դարձել, ինչի վկայութիւնն անցած շաբաթ տեղի ունեցած ատրպէյճանական սադրիչ գործողութիւններն էին Լոս Անճելըսում Ատրպէյճանի գլխաւոր հիւպատոսությեան առջեւ հայ համայնքի խաղաղ ցոյցի ընթացքում, ինչպէս նաեւ Սան Ֆրանսիսքոյի Գռուզեան-Զաքարեան-Վասպուրական վարժարանի նկատմամբ վանտալիզմը։
Հաշուի առնելով ատրպէյճանական կողմից դրսեւորուող թշնամական տրամադրուածութիւնը հայերի նկատմամբ՝ մեր համայնքին յորդորում ենք լինել առաւելագոյն զգոյշ եւ զգօն ատրպէյճանական հրահրիչ գործողութիւնների դիմաց, ձեռնպահ մնալ որեւէ քայլից, որը կարող է հող ստեղծել ատրպէյճանական սադրիչ գործողութիւնների համար։ Յորդորում ենք՝ ատրպէյճանական հաւանական սադրանքի կասկածի դէպքում անմիջապէս դիմել իրաւապահ մարմիններին։
ՀՀ գլխաւոր հիւպատոսութիւնն իր հերթին կ’անի հնարաւորը՝ իրաւապահ մարմինների՝ համայնքի անվտանգութեան ապահովմանն ուղղուած աշխատանքին նպաստելու համար։
31 Յուլիսի, 2020թ
