Ուրբաթ, Ապրիլ 17-ի երեկոյեան, Հայաստանի վարչապետ Նիկոլ Փաշինեան պատգամ ուղղեց քաղաքացիներուն, իրազեկելով՝ «Քորոնա» ժահրի համաճարակի պայմաններուն տակ երկրի դիմագրաւած առողջական եւ տնտեսական դժուարութիւններուն ու տարուող աշխատանքներուն:
Վարչապետը յայտնեց որ, վարակի տարածումը կը շարունակէ մնալ կառավարելի եւ փուլ առ փուլ կը թոյլատրուի տնտեսական գործունէութեան վերսկսումը՝ զանազան ոլորտներէն ներս:
«Աշխարհի շատ երկրներում Հայաստանի օրինակն ի ցոյց է դրւում, թէ ինչպէս է պէտք վարուել սեփական քաղաքացիների հետ օրհասական եւ ճգնաժամային պահերին», – աւելցուց Հայաստանի վարչապետը:
Նիկոլ Փաշինեան նաեւ յայտնեց, որ այս օրերուն ապահովուած է հազարաւոր ՀՀ քաղաքացիներու վերադարձը հայրենիք, ինչ որ կատարուած է ինչպէս պետական պիւտճէի միջոցներով, այնպէս ալ հայաստանեան եւ սփիւռքահայ կազմակերպութիւններու ու բարերարներու աջակցութեամբ:
Վարչապետը ապա թուարկեց ժողովուրդի տարբեր խաւերու, ինչպէս նաեւ տնտեսական գործունէութիւն ծաւալող հիմնարկներուն տրուող օժանդակութեան ծրագիրները:
Փաշինեան իր ելոյթը աւարտեց, կրկնելով Յեղափոխութեան օրերուն իր կողմէ բազմաթիւ անգամներ հնչած կարգախօսով՝ «Հայաստանի ապագան կախուած է մէկ մարդուց, եւ այդ մէկ մարդը դու ես»:
