Լոս Անճելըս Գաւառի Հանրային Առողջապահութեան Բաժանմունքի ամենօրեայ ասուլիսի ընթացքին, բաժանմունքի խօսնակ Կարին Օհաննէսեան Հայերէն լեզուով պատգամ յղեց Ամերիկահայ համայնքին՝ կոչ ընելով բոլորին հետեւելու ապահով միջոցառումներուն, որպէսզի չվարակուին «քորանա» ժահրով:
Վերջին տուեալներուն համաձայն, որոնք հրապարակուած են Լոս Անճելըս Գաւառի Հանրային Առողջապահութեան Բաժանմունքի կայքէջին վրայ, Կլէնտէլի մէջ վարակուածներու թիւը ամենաբարձրն է Գաւառին մէջ՝ մինչեւ օրս 166 դէպք: Հայաշատ այլ քաղաքներուն մէջ Պըրպէնքը ունի 83 դէպք, Նորթ Հոլիվուտ՝ 103 դէպք, Հոլիվուտ՝ 109 դէպք, եւ Փասատինա՝ 80 դէպք:
Ասոր կողքին, բազմաթիւ երէցներու հաստատութիւններուն՝ ծերանոցներու բնակիչներուն մէջ արձանագրուած են վարակման դէպքեր: Անոնց շարքին է Իկըլ Ռոքի Արարատ Տունը, որու պատասխանատուները կը հաստատեն, որ կացութիւնը հսկողութեան տակ է եւ կանխարգելիչ միջոցներ ձեռք կ՛առնուին՝ «քորոնա» ժահրի յաւելեալ դէպքերու առաջքը առնելու համար:
