Ամառնային ողիմպիական խաղերուն ընդառաջ, յունահռոմէական ոճի ըմբիշներ, աշխարհի եռակի ախոյեան, Եւրոպայի հնգակի ախոյեան Արթուր Ալեքսանեանն ու Կարապետ Չալեանն առաջիկայ օրերուն պիտի մեկնին մարզական հաւաքներու: Ինչպէս կը հաղորդէ «Արմէնբրես»-ը, այս մասին մարզիկները յայտնած են Փետրուար 17-ին լրագրողներու հետ ճեպազրոյցի ժամանակ:
Անդրադառնալով Հռոմի մէջ կայացած առաջնութեան՝ Արթուր Ալեքսանեանը նշած է, որ միակ մտավախութիւնն այդ մրցումներու ժամանակ Ողիմպիական խաղերուն ընդառաջ վնասուածք ունենալն էր: «Մնացածը՝ լաւ մարզավիճակում էի, ինձ լաւ էի զգում: Գօտեմարտել եմ իմ հիմնական մրցակիցների հետ ու բոլորին լաւ ճանաչում էի»,-նշած է Արթուր Ալեքսանեանը: Անդրադառնալով թուրք եւ ատրպէյճանցի երկրպագուներու եւ թուրք մարզիկի պահուածքին՝ յաղթական պատուոյ հարթակի վրայ մէջքով հայկական դրօշին կանգնելուն, մարզիկը նշեց, որ այդ պահուածքը կարեւոր չէ: «Այդ ժամանակ ես չեմ տեսել, ինձ յետոյ ասացին, բայց, եթէ նոյնիսկ նրանք դէմքով չշրջուեցին դրօշին, հայոց հիմնը լսեցին: Իմ հակառակորդ ատրպէյճանցի մարզիկն աւելի շատ հայկական հիմն է լսել, քան թրքականը: Այնպէս որ, նրանց մէջքով շրջուելը կարեւոր չէ»,-նշած է Արթուր Ալեքսանեանը՝ տեղեկացնելով որ դահլիճին մէջ շատ եղած են հայ երկրպագուներ, անոնց շարքին` նաեւ Ֆութպոլի Հայաստանի հաւաքականի առաջատար Հենրիկ Մխիթարեանը, որ իրեն աւելի ոգեւորած է:
Կարապետ Չալեանն ալ խոստացած է Ողիմպիական խաղերուն չշտապել: «Կ’աշխատեմ ողիմպիական մրցումների ժամանակ չշտապել, հենց այդ շտապելն է որ խանգարում է ինձ յաղթել»,-անկեղծացած է Չալեանը: Խօսելով Եւրոպայի առաջնութեան իր մրցակիցներու մասին՝ Կարապետ Չալեանը նշած է, որ բաւական բարդ էր. «Բոլորը փորձառու ըմբիշներ էին, դժուար էր գօտեմարտելը, բայց փա՛ռք Աստուծոյ, առանց մետալ չվերադարձայ»:
Իտալիոյ մայրաքաղաք Հռոմի մէջ կայացած յունահռոմէական ոճի ըմբշամարտի Եւրոպայի առաջնութիւնը Հայաստանը նուաճած է 4 մետալ՝ 2 ոսկէ եւ 2 պրոնզէ: Գէորգ Ղարիպեանն ու Արթուր Ալեքսանեանը դարձան Եւրոպայի ախոյեաններ, իսկ Կարէն Ասլանեանն ու Կարապետ Չալեանը նուաճեցին պրոնզէ մետալ: