Ռուսական «Փորձագէտ» ամսագիրը ծաւալուն յօդուածի մէջ անդրադարձած է 2018 թուականի Ապրիլին Հայաստանի մէջ տեղի ունեցած թաւշեայ յեղափոխութենէն ետք երկրի մէջ տիրող իրավիճակին, հայ-ռուսական յարաբերութիւններուն, նոր կառավարութեան գործունէութեան շնորհիւ գրանցուած տնտեսական ցուցանիշներուն:
«Հայաստանի մէջ մինչեւ այս պահը յետյեղափոխական զարգացումներ կը գրանցուին: Երկրի վարչապետ Նիկոլ Փաշինեանն իշխանութեան եկաւ 2018 թուականի Ապրիլ-Մայիսին տեղի ունեցած բողոքի ցոյցերու հետեւանքով: Աւելի ուշ՝ Դեկտեմբերին, Փաշինեանը վերահաստատեց իր լիազօրութիւնները. խորհրդարանական ընտրութիւններուն անոր ղեկավարած «Իմ քայլը» դաշինքը յաղթեց՝ հաւաքելով ընտրողներու ձայներու 70,43 տոկոսը: Այսօր ան հսկայական աջակցութիւն ունի՝ հակառակ վարկանիշները պարբերաբար կը նուազին, եւ այդ հասկնալի է, քանի որ կարելի չէ արագ կեանքի կոչել բոլոր խոստումները»,- ըսուած է յօդուածին մէջ:
Անդրադառնալով հայ-ռուսական յարաբերութիւններուն՝ յօդուածագիրն ընդգծած է, որ յեղափոխութեան ալիքի վրայ յատկապէս ռուսական լրատուամիջոցները Փաշինեանին գրեթէ կը համարէին ամերիկեան «նախագիծ», իսկ յետոյ աւելի յարգալից՝ բազմակողմանի քաղաքական գործիչ: «1.5 տարուան ընթացքին Փաշինեանը պաշտօնական այցով Մոսկուա չէ եղած՝ հակառակ որ աշխատանքային այցերով Մոսկուա եղած է, օրինակ, ԵԱՏՄ-ի շրջածիրէն ներս: Փոխարէնը ե՛ւ Պրիւքսէլի, ե՛ւ հարեւան Թիֆլիսի, ե՛ւ Թեհրանի մէջ Փաշինեանը արդէն ընդունած են: Փաշինեանի պաշտօնական այցը Ռուսաստան, կարծես, ծրագրուած է 2020 թուականի առաջին կէսին, իսկ Վլատիմիր Փութինն այս աշնան այցելած է Երեւան եւ կառուցողական շփում ունեցած հայ գործընկերոջ հետ: Այնպէս որ, պէտք չէ խօսիլ յարաբերութիւններուն մէջ առկայ ճգնաժամի մասին, իսկ բազմակողմնութեան մասին, այո, այդ նոր երեւոյթ է, որ կը սահմանէ Մոսկուայի եւ Երեւանի միջեւ երկխօսութիւնը:
Յօդուածագիրը մէջբերած է քաղաքագէտներուն, որոնք ընդգծած են, թէ Ռուսաստանի լաւագոյն աջակցութիւնն այն է, որ յեղափոխութեան ժամանակ չէ խառնուած Հայաստանի ներքին գործերուն՝ աւելցնելով, որ ՌԴ-ն Հայաստանի ներքին գործերուն չի խառնուիր նաեւ յեղափոխութենէն ետք:
Յօդուածին մէջ ծաւալուն անդրադարձ կայ նաեւ Հայաստանի նոր կառավարութեան գործունէութեան շնորհիւ արձանագրուած տնտեսական ցուցանիշներուն: Նշուած է, որ 2019 թուականի առաջին 9 ամիսներուն Հայաստանի Համախառն ներքին արդիւնքի (ՀՆԱ) աճը կազմած է 7,5 տոկոս՝ հակառակ նախորդ տարուան քաղաքական ցնցումներուն եւ վերնախաւի փոփոխութեան: Արդիւնաբերական արտադրանքն աճած է գրեթէ 10 տոկոսով, իսկ ստուերային տնտեսութիւնը մէկ տարուան ընթացքին նուազած է՝ 25 տոկոսէն հասնելով 22 տոկոսի:
