Տնտեսական աշխուժութեան ցուցանիշը այս տարուան Մայիսին նախորդ տարուայ Մայիսի համեմատ աճած է 7,3 տոկոսով: Այս մասին կը փաստեն ՀՀ ազգային վիճակագրական կոմիտէի հրապարակած տուեալները:
Մասնաւորապէս 2019-ի Մայիսին 2018-ի Մայիսի համեմատ արդիւնաբերական արտադրանքի ծաւալը աճած է 10,2 տոկոսով, շինարարութեան ծաւալը` 2 տոկոսով, առեւտուրի շրջանառութիւնը՝ 4,9 տոկոսով, իսկ ծառայութիւններու ծաւալը՝ 14,8 տոկոսով:
Միջին ամսական անուանական աշխատավարձը Հայաստանի մէջ այս տարուան Մայիսին աճած է 6,5 տոկոսով՝ կազմելով 179 հազար 623 դրամ: Ընդ որում‘ պետական օղակին մէջ միջին ամսական աշխատավարձը աւելցած է 6,9 տոկոսով, իսկ ոչ պետականինը՝ 4,7 տոկոսով:
Արտաքին առեւտրաշրջանառութեան ծաւալներուն մէջ այս տարուան Մայիսին նախորդ տարուայ Մայիսի համեմատ նկատուած է նուազում` շուրջ 3,9 տոկոսով: Սակայն արտահանումը աճած է 11,7 տոկոսով, իսկ ներմուծումը նուազած է 10,5 տոկոսով:
