Ապրիլեան պատերազմէն օրեր անց պաշտօնէն ազատուած բարձրաստիճան զինուորական Կոմիտաս Մուրադեանը դէմ չէ, որ պատերազմի հանգամանքները քննէ Ազգային ժողովէն ներս ստեղծուած յանձնաժողովը:
«Յոյսեր կապելու եմ միանշանակ: Եթէ որոշուել է, թող զբաղուեն: Որովհետեւ իմ հետ կապուած հարցեր կան, դրա համար աւելի ճիշդ մենք առերես կը խօսենք», – «Ազատութեան» հետ զրոյցի ժամանակ ըսած է Մուրադեանը:
2016-ին Զինուած ուժերու կապի զօրքերու, կապի ինքնաշխատ կառավարման համակարգերու վարչութեան պետի պաշտօնը զբաղեցուցած, Մուրադեանին ալ յուզող հարցեր կան: Օրինակ, իր պաշտօնանկութեան պատճառները․ – «Որովհետեւ զոհերից մէկը ես եմ»:
Յիշեցնենք, որ Ապրիլեան քառօրեայ պատերազմի հանգամանքները ուսումնասիրող քննիչ յանձնաժողովը մէկ շաբաթ է արդէն ձեւաւորուած է՝ վարչապետ Նիկոլ Փաշինեանի յանձնարարութեամբ, Ազգային ժողովի պաշտպանութեան եւ անվտանգութեան հարցերու յանձնաժողովի կազմով: Պիտի ուսումնասիրեն պատերազմի օրերուն բանակին մէջ յայտնաբերուած չարաշահումներն ու բացթողումները՝ ընդհուպ մեծաթիւ զոհերու պատճառներն ու հակառակորդի յարձակման ժամանակին չարձագանգելու տեղեկութիւնները:
2016-ի Ապրիլ 26-ին պաշտօնէն ազատուած պաշտպանութեան նախկին փոխնախարար Ալիկ Միզրաբեկեանը նիւթաթեխնիքական ապահովման բաժնի պատասխանատուն եղած է: Ան ըսած է, թէ յանձնաժողովի ուսումնասիրութիւններով մտահոգուած չէ, աւելցնելով, որ իր համակարգած ոլորտի վերաբերեալ հարցերուն առայժմ պատասխանել չուզեր, յանձնաժողովին մէջ կը խօսի՝ եթէ իրեն ալ հրաւիրեն․ – «Ես որեւէ մտավախութիւն չունեմ: Երբ որ կը հրաւիրեն, էն ժամանակ կը խօսենք»:
Ապրիլ 26-ին Սերժ Սարգսեանի հրամանով պաշտօնէն ազատուած էր նաեւ Զինուած ուժերու գլխաւոր շտապի հետախուզութեան վարչութեան պետ Արշակ Կարապետեանը, որ յեղափոխութենէն ետք նշանակուած է վարչապետ Նիկոլ Փաշինեանի խորհրդական:
Օրէնսդիր մարմնի քննիչ յանձնաժողովէն լուրջ ակնկալիքներ ունի 2008-ին Պաշտպանութեան փոխնախարարի պաշտօնէն ազատուած Գագիկ Մելքոնեանը:
Ան համաձայն է, որ պատերազմը զգայուն հարց է, բայց այդ օրերուն ի յայտ եկած խնդիրներու մասին խօսիլն ու մեղաւորները պատժելը խիստ անհրաժեշտութիւն կը համարէ:
Յանձնաժողովը, ըստ Մելքոնեանի, պէտք է պատասխանէ օդէն կախուած գլխաւոր հարցին՝ ինչի՞ հետեւանքով Ապրիլին հայկական կողմը աւելի քան հարիւր զոհ ու 800 հեքթար տարածքային կորուստ ունեցաւ: Ան կը վստահեցնէ, որ այս եւ այլ հարցերու պատասխանները հանրայնացնելը ամենեւին ալ վտանգաւոր չեն:
Ռազմական գաղտնիքներու արտահոսքի եւ պետական անվտանգութեան հետ կապուած ընդդիմախօսներու մտահոգութիւնները, ըստ նախկին փոխնախարարի, անտեղի են: