Ատրպէյճանը հակուած է Լեռնային Ղարաբաղի հակամարտութեան խաղաղ կարգաւորման, բայց պիտի շարունակէ իր ռազմական հզօրութեան մեծացումը, յայտարարած է Ատրպէյճանի նախագահ Իլհամ Ալիեւը, կը հաղորդէ «Ինթըրֆաքս-Ատրպէյճանը»:
«Մենք կը փորձենք հակամարտութիւնը կարգաւորել քաղաքական-դիւանագիտական եւ խաղաղ ճանապարհով: Բայց ատոր հետ մէկտեղ, կը մեծցնենք մեր ռազմական հզօրութիւնը: Այս ուղղութեամբ այսուհետեւ եւս պիտի ձեռնարկուին բոլոր անհրաժեշտ քայլերը»,- յայտարարած է Ալիեւը:
«Ատրպէյճանը այս ուղղութեամբ բոլոր անհրաժեշտ աշխատանքները կը կատարէ: Ռազմական եւ տնտեսական ներուժը, բնականաբար, մեր երկիրը կ’ամրապնդէ: Մենք այսուհետեւ այս ուղղութեամբ եւս պիտի շարունակենք մեր հետեւողական քաղաքականութիւնը»,- աւելցուցած է ան:
Ալիեւը նշած է, որ 2016 թուականին ղարաբաղեան հակամարտութեան գօտիին վրայ Հայաստանի հետ ապրիլեան ռազմական բախումները ցոյց տուին, որ «Ատրպէյճանը կրնայ իր տարածքային ամբողջականութիւնը վերականգնել ռազմական ճանապարհով»:
«Մեր հիմնական նպատակն է հակամարտութեան կարգաւորումը»,- ըսած է Ատրպէյճանի նախագահը:
