Ղարաբաղեան հակամարտութեան կարգաւորման հարցով Փարիզի մէջ մօտ չորս ժամ տեւած բանակցութիւններէն ետք պաշտօնական Երեւանն ու Պաքուն յայտարարած են՝ տեղի ունեցած է միտքերու օգտակար եւ կառուցողական փոխանակում, ինչը ուղղուած էր նաեւ առաւել լայն փոխըմբռնման եւ փոխվստահութեան հաստատման:
Փարիզեան բանակցութիւններու վերաբերեալ թէ՛ Ատրպէյճանի, թէ՛ Հայաստանի դիւանագիտական գերատեսչութիւնները գրեթէ նոյնաբովանդակ հաղորդագրութիւններ տարածած են: Երկու կողմն ալ նշած են, որ Մամետեարովն ու Մնացականեանը «անդրադարձած են խաղաղ գործընթացին առնչուող հարցերու լայն շրջանակի՝ ներառեալ ժողովուրդներուն խաղաղութեան նախապատրաստելուն, ինչպէս նաեւ անվտանգութեանն ու տարածաշրջանային կայուն զարգացման հարցերուն»:
Հայաստանի և Ատրպէյճանի արտաքին գործոց նախարարներու այս հանդիպումը արդէն չորրորդն է անցած տարի Հայաստանի մէջ տեղի ունեցած իշխանափոխութենէն ետք:
Ատրպէյճանի դիւանագիտական գերատեսչութեան տարածած հաղորդագրութեան համաձայն, Հայաստանի եւ Ատրպէյճանի արտաքին գործոց նախարարներու յաջորդ հանդիպումը եւս պիտի չուշանայ՝ անոնք պայմանաւորուած են ղարաբաղեան հակամարտութեան կարգաւորման ուղղուած հետեւողական, նպատակաուղղուած շփումները շարունակել յառաջիկայ Փետրուարին: Հայկական կողմի հաղորդագրութեան մէջ, սակայն, նշուած է, որ հանդիպման նոր ժամկէտները դեռ հաստատուած չեն:
