Իշխանութիւնը միտքը չէ փոխած. վարչապետ Նիկոլ Փաշինեանը կառավարութեան նիստի մեկնարկին յայտարարած է՝ նախարարութիւններու թիւը պիտի կրճատուի: Բայց քանի դեռ կը քննարկուին կառավարութեան կառուցուածքին մէջ փոփոխութիւնները, որոշ գերատեսչութիւններու ղեկավարներ ուղղակի պիտի չնշանակուին։ Փաշինեանը, սակայն, չէ յստակեցուցած՝ յատկապէս որ նախարարները: Կ’ենթադրուի, որ պիտի չնշանակուին կրճատուող նախարարութիւններու ղեկավարները։
«Օրէնքի համաձայն կառավարութիւնը ձեւաւորուած է համարւում, երբ նշանակուած է կառավարութեան անդամների երկու երրորդը։ Կը գնանք այդ ճանապարհով՝ կառավարութեան անդամների երկու երրորդը կը նշանակուի, մէկ երրորդը չի նշանակուի քանի դեռ մենք չենք յստակեցրել կառավարութեան կառուցուածքի փոփոխութիւնների հետ կապուած հարցերը», – նշած է վարչապետը։
Փաշինեանը յղում ըրած էր կառավարութեան կառուցուածքի եւ գործունէութեան մասին օրէնքին, որ կը սահմանէ՝ նշանակումէն ետք հնգօրեայ ժամկէտի ընթացքին գործադիր ղեկավարը նախագահին կը ներկայացնէ փոխվարչապետներու ու նախարարներու թեկնածուները։ Իսկ նախարարները պէտք է նշանակուին մինչեւ Կիրակի օր։ Նախարարութիւններու թիւը կրնայ կրճատուիլ նոյն՝ կառավարութեան կառուցուածքի մասին օրէնքին մէջ փոփոխութիւններէն ետք միայն:
Դեռ անցած տարի որոշ նախարարութիւններ ստացած էին նախագիծ մը, ըստ որուն, այլեւս պիտի չըլլայ առաջին փոխվարչապետի պաշտօն, նախարարութիւններու թիւ ալ պիտի կրճատուի 5-ով՝ դառնալով 12։
Այս կրճատումներուն ընդդիմադիր «Լուսաւոր Հայաստանը», Էտմոն Մարուքեանի խօսքով, կողմ է, բայց, ինչպէս ձեւակերպած է ան, նախագծին մէջ նախեւառաջ կ’ակնկալեն տեսնել, որ վերափոխուած է սուփըրվարչապետական համակարգը:
Մարուքեանի կարծիքով՝ Ազգային անվտանգութեան ծառայութիւնը (ԱԱԾ), Ոստիկանութիւնը, Պետական եկամուտներու կոմիտէն (ՊԵԿ) պէտք է դառնան նախարարութիւններ եւ ոչ միայն վարչապետի ու կառավարութեան, այլ նաեւ՝ խորհրդարանական վերահսկողութեան տակ գտնուին։ Եթէ նոյն կառուցուածքը պահպանուի, Մարուքեան ըսած է՝ առաջարկին միանշանակ դէմ կ’ըլլան:
Մինչեւ Սերժ Սարգսեանի պաշտօնավարման աւարտը՝ 2018 թուականի Ապրիլի 9-ը, ուժային կառոյցները, մասնաւորապէս, ոստիկանութիւնն ու ազգային անվտանգութեան ծառայութիւնը, ոչ թէ վարչապետին ենթակայ մարմիններ էին, այլ՝ կառավարութեան առընթեր: Փոփոխութիւնը Հանրապետական իշխանութիւնը նախաձեռնեց:
Խորհրդարանի մեծութեամբ երկրորդ ուժը՝ ԲՀԿ-ը, չէ յստակեցուցած թէ ոստիկանութեան եւ ԱԱԾ յետագայ կարգավիճակի մասին ի՞նչ դիրքորոշում ունին: Իսկ իշխանական «Իմ քայլ»-էն Պաշտպանութեան եւ անվտանգութեան հարցերու մշտական յանձնաժողովի նախագահի թեկնածու Անդրանիկ Քոչարեանը կը կարծէ՝ գոցէ անհրաժեշտ է, որ ոստիկանութիւնն ու ԱԱԾ-ն դառնան նախարարութիւններ: Այդ պարագային աւելի վերահսկելի կ’ըլլան։