Home ՄԻՋԱԶԳԱՅԻՆ Reuters .«Ամերիկեան Նաւթային Ընկերութիւնները կը Պատրաստուին Լքել Ատրպէյճանական Շուկան»

Reuters .«Ամերիկեան Նաւթային Ընկերութիւնները կը Պատրաստուին Լքել Ատրպէյճանական Շուկան»

by MassisPost

Չի բացառուիր, որ արդէն յառաջիկայ ամիսներուն ամերիկեան երկու խոշորագոյն նաւթային ընկերութիւնները` Chevron-ը եւ Exxon Mobil-ը, 25 տարի տեւած աշխոյժ ներկայութենէ ետք լքեն ատրպէյճանական շուկան: Այս մասին, վկայակոչելով նաւթարդիւնաբերութեան ոլորտի իր աղբիւրները, կը տեղեկացնէ Reuters գործակալութիւնը:

«Exxon-ը յոյս ունի Կասպից ծովին մէջ գտնուող «Ազերի-Չիրաղ-Կիւնեշլի» նաւթահորերուն մէջ ունեցած 6,8 տոկոս կազմող բաժնեմասի վաճառքի շնորհիւ շուրջ 2 միլիառ ամերիկեան տոլար վաստակիլ, կը պնդեն ոլորտին մօտ կանգնած աղբիւրները», – գրած է Reuters-ը` աւելցնելով. – «Exxon-ի մրցակից Chevron ընկերութիւնը Reuters-ին տրամադրած յայտարարութեան մէջ նշած է, որ որոշած է վաճառել «Ազերի-Չիրաղ-Կիւնեշլի» նաւթահորի բաժնետոմսերու իրեն պատկանող չափաբաժինը` 9,57 տոկոսը: Ընկերութիւնը նաեւ մտադիր է վաճառել Պաքու-Թիֆլիս-Ճեյհան խողովակաշարի բաժնետոմսերու 9 տոկոսը»:

Հակառակ համաշխարհային նաւթային շուկային մէջ շրջանառուող լուրերուն եւ Chevron-էն եկող հաստատման, Exxon-ի ղեկավարութիւնը առայժմ կը խուսափի որեւէ մանրամասն տեղեկութիւն հաղորդել ատրպէյճանական շուկան լքելու վերաբերեալ:

«Բաժնեմասերու վաճառքը կը նշանակէ, որ ամերիկեան այս երկու ընկերութիւններու քառորդ դար տեւած ներկայութիւնը Ատրպէյճանի մէջ մօտեցած է աւարտին: Exxon-ը եւ Chevron-ը Խորհրդային Միութեան փլուզումէն ետք մեծապէս օժանդակած են Ատրպէյճանի ժամանակակից նաւթարդիւնաբերութեան ստեղծման` 1994 թուականին ձեռք բերելով «Ազերի-Չիրաղ-Կիւնեշլի» նաւթահորերու բաժնեմասերը», – գրած է Reuters-ը՝ յիշեցնելով, որ ժամանակին այդ համաձայնագիրը «Դարի պայմանագիր» հռչակուած էր, որու միջոցով Արեւմուտքը յոյս ունէր թուլացնել Եւրոպայի կախուածութիւնը՝ ռուսաստանեան նաւթէն եւ կազէն:

Reuters-ը նաեւ յիշեցուցած է, որ այսօր ատրպէյճանական նաւթարդիւնաբերութեան ոլորտին մէջ հինգ ամերիկեան ընկերութիւններ ներկայացուած են: Exxon-էն եւ Chevron-էն բացի, Ատրպէյճանի մէջ կ’աշխատին նաեւ ամերիկեան Amoco, Pennzoil եւ McDermott նաւթային ընկերութիւնները:

Ամերիկեան ընկերութիւնները, ըստ Reuters-ի, այժմ սկսած են կեդրոնանալ ԱՄՆ տարածքին մէջ, ինչպէս նաեւ Հարաւային Ամերիկայի մէջ գտնուող նաւթային պաշարներու արդիւնահանման վրայ:

Միացեալ Նահանգներու ուժանիւթի նախարարութեան նախկին բարձրաստիճան պաշտօնեաներէն մէկը «Թուրանի» թղթակցին հետ զրոյցի ժամանակ նշած է, որ ամերիկեան ընկերութիւններու` Ատրպէյճանը լքելու որոշումը հիմնական տնտեսական դրդապատճառներ ունի, թէեւ անոնք միակը չեն:

Հարակից Նյութեր

Leave a Comment