Home ԳԼԽԱՒՈՐ ԼՈՒՐԵՐ Հայաստանի Մէջ Այնքան Ալ Բաց Չեն Դաշտերը, որ Խոշոր Ներդրումները Հոսին Երկիր. Յակոբ Պատալեան

Հայաստանի Մէջ Այնքան Ալ Բաց Չեն Դաշտերը, որ Խոշոր Ներդրումները Հոսին Երկիր. Յակոբ Պատալեան

by MassisPost

Հայաստանն ունի պիզնես գրաւչութեան խնդիր, եւ բնական է, որ ամերիկացի ներդրողները դեռ Հայաստան չեն շտապեր։ Այս մասին ըսած է Քաղաքական մեկնաբան Յակոբ Պատալեանը, նկատել տալով, որ Հայաստանի մէջ սպասումները չափազանցուած են։

«Մենք ունենք մի համակարգ, որտեղ շատ ահռելի դեր ունեն ռուսական խոշոր կորպորացիաները (ընկերութիւնները), որտեղ որ հնարաւոր է խոշոր ներդրում, եւ նաեւ Հայաստանի տեղի, այսպէս ասած, քրէաօլիկարխիկ համակարգի ներկայացուցիչները, եւ այս տեսանկիւնից այնքան էլ բաց չեն դաշտերը, որ խոշոր ներդրումները հոսեն Հայաստան։ Սա առարկայական իրավիճակ է, եւ ի հարկէ նաեւ շատ կարեւոր է, թէ նոր կառավարութիւնը տնտեսական ինչպիսի քաղաքականութիւն է վարելու, ինչքանով է ինստիտուցիոնալ (օրինական) կաշառակերութեան դէմ պայքարը, ինչքանով է արդարադատութեան համակարգը կայանալու, եւ, իհարկէ, նաեւ տնտեսական միւս խաղի կանոնները, որոշումները՝ հարկային դաշտ եւ այլն, էս ամէն ինչը չափազանց կարեւոր է, եւ հիմա առայժմ պատասխանները շատ քիչ են», – «Ազատութեան» հետ զրոյցի ժամանակ ըսած է Պատալեանը։

Անդրադառնալով ամերիկա-բրիտանական «Լիտիան» ընկերութեան կողմէն ոսկիի հանքավայրի շահագործման խնդիրին,քաղաքական մեկնաբանն ըսած է՝ սա ցաւոտ խնդիր է նոր կառավարութեան համար։

«Բաւական հակասական իրավիճակ է. մի կողմից` քաղաքացիները պահանջում են բնապահպանութիւն եւ այլն, պահանջում են էդ վտանգները չէզոքացնելու համար փակել հանքը եւ այլն, միւս կողմից` կառավարութիւնը նման որոշման գնալու համար, եթէ նոյնիսկ ինքը չի տուել էդ հանքի շահագործման իրաւունքը, նման որոշման գնալու համար պէտք է ունենայ ծանրակշիռ պատճառներ, փաստեր, հակառակ դէպքում «Լիտիան»-ը միջազգային դատարանում կարող է վիճարկել, եւ Հայաստանը կարող է յայտնուել մեծ ֆինանսական պարտաւորութիւնների տակ», – ըսած է Պատալեանը։

Ան բնական կը համարէ, որ թէ՛ Միացեալ Նահանգները, թէ՛ Եւրոմիութիւնը չեն շտապեր աւելցնել Հայաստանին տրուող օժանդակութեան չափը։

«Սա իհարկէ բնական է, բոլորն ուզում են տեսնել, թէ նոր կառավարութիւնն իրենից ինչ է ներկայացնում, բայց միւս կողմից՝ տարօրինակ է, որ Հայաստանում տեղի ունեցած փոփոխութիւնը որեւէ կերպ առարկայօրէն շատ թէ քիչ չի արտացոլուում Արեւմուտքի գործողութիւններում։ Հայաստանում ի վերջոյ տեղի է ունեցել փոփոխութիւն՝ նախկին իշխանութիւնը, որի վերաբերեալ հենց Արեւմուտքն ունէր, մեղմ ասած, բազմաթիւ հարցեր, հիմա էս համակարգը հեռացուել է ժողովրդական ոչ բռնի թաւշեայ յեղափոխութեան միջոցով եւ ձեւաւորուել է ժողովրդի վստահութիւնը վայելող կառավարութիւն՝ դա արդէն փոփոխութիւն է, եւ էս փոփոխութիւնը գործնական փոփոխութիւն է, եւ գործնական փոփոխութիւնը ենթադրում է, որ նաեւ դրա հանդէպ վերաբերմունքը ինչ-որ կերպ պէտք է գործնականօրէն փոխուի», – ընդգծած է քաղաքական մեկնաբանը։

Հարակից Նյութեր

Leave a Comment