Անցնող Շաբաթ օր Երեւանի Ազատութեան հրապարակի վրայ անդրանիկ հանրահաւաքը իրականացուց «Յանուն Հայաստան պետութեան» ճակատը:
Այս շարժումը կամ նախաձեռնութիւնը կը յաւակնի դառնալ այն բեմը, որ կը պայքարի իշխանափոխութեան համար: Ճակատը կը փորձէ իր շուրջ համախմբել տարբեր քաղաքական կուսակցութիւններ, անհատներ:
Յաջորդ հանրահաւաքը տեղի պիտի ունենայ Մարտի 16-ին:
Հանրահաւաքին ներկայ էին Ազգային ժողովի «Ելք» խմբակցութեան ղեկավար Նիկոլ Փաշինեանը, խմբակցութեան պատգամաւոր Արարատ Միրզոյեանը, շարք մը իրաւապաշտպաններ:
Իրաւապաշտպան Արթուր Սաքունցը ելոյթ ունեցած է եւ խօսած է Հայաստանի մէջ «քաղբանտարկեալներու» մասին մասնաւորապէս նշելով Շանթ Յարութիւնեանի, Ժիրայր Սեֆիլեանի, Անտրիաս Ղուկասեանի անունները: Ան յայտարարած է, որ անընդունելի է այս դարուն ունենալ նման վճիռներով բանտարկեալներ:
