Եւրոպական հարեւանութեան քաղաքականութեան եւ ընդլայնման բանակցութիւններու հարցերով Եւրոմիութեան յանձնակատար Եոհանէս Հան Պրիւքսէլի մէջ նախատեսուած Եւրոմիութիւն-Թուրքիա բարձր մակարդակի երկխօսութեան ծիրին մէջ հերթական նիստէն առաջ Անգարային հերթական անգամ կոչ ուղղած է յարգել մարդու իրաւունքները եւ բոլորին հնարաւորութիւն տալ իրենց կարծիքն արտայայտելու:
Երկուշաբթի օր ասուլիսի ընթացքին Հան մասնաւորապէս յայտարարած է, թէ Պրիւքսէլի մէջ անհանգստացած են «Ճումհուրիէթ» թրքական ընդդիմադիր թերթի յայտնի լրագրողներու եւ անոնց գործընկերներուն նկատմամբ Պոլսոյ մէջ նախօրէին մեկնարկած դատավարութեամբ:
Ահաբեկչական կառոյցներուն աջակցութիւն ցուցաբերելու մէջ մեղադրուող թրքական առաջատար պարբերականի աշխատակիցներու դատավարութիւնը, յիշեցնենք, տեղի կ’ունենայ Գերմանիոյ եւ Թուրքիոյ միջեւ օր օրի խորացող լարուածութեան ֆոնին: Երկու դաշնակից երկիրներու յարաբերութիւնները կրկին սրուեցան վերջին շաբաթներուն, երբ Պոլսոյ ոստիկանութիւնը ձերբակալեց խումբ մը իրաւապաշտպաններ, որոնց թուին է նաեւ Գերմանիոյ քաղաքացի Փիթըր Շփոյտնըր: Թուրքիա զանոնք եւս կը մեղադրէ ահաբեկիչներուն սատարելու մէջ:
Այսպիսով, ինչպէս յայտարարած է Եոհանէս Հան, Եւրոմիութեան անդամակցիլ ցանկացող Թուրքիա «անընդմէջ կը հեռանայ եւրոպական չափանիշներէն»:
«Այն, ինչ ր տեղի կ’ունենայ Թուրքիոյ մէջ, շատ մտահոգիչ է, յատկապէս երբ գործը կը հասնի լրագրողներուն եւ լրատուամիջոցներուն: Ես կրնամ միայն կոչ ուղղել թրքական իշխանութիւններուն՝ յարգելու խօսքի ազատութիւնը եւ հնարաւորութիւն տալու բոլորին իրենց կարծիքն արտայայտելու», – ըսած է եւրոպացի բարձրաստիճան պաշտօնեան:
Մէկ տարի շարունակ հեղինակաւոր իրաւապաշտպան կազմակերպութիւններն ու Թուրքիոյ արեւմտեան դաշնակիցները խստօրէն կը քննադատեն երկրի նախագահ Ռեճէփ Էրտողանը, անոր կառավարման օրօք մարդու իրաւունքներու ոլորտին մէջ արձանագրուող աննախադէպ յետընթացին համար: Անգարա ոչ միայն չի հետեւիր կոչերուն, այլեւ հետզհետէ աւելի կը խստացնէ ճնշումները: Անցեալ տարուայ ձախողած պետական յեղաշրջման փորձէն ետք Թուրքիոյ մէջ կալանաւորուած է 50 հազար անձ, շուրջ 150 հազար ձերբակալուած կամ հեռացուած է աշխատանքէն: Թուրքիոյ լրագրողներու միութեան տուեալներով, իշխանութիւններու կողմէ իրականացուած զտման հետեւանքով երկրին մէջ փակուած է 150 լրատուամիջոց, շուրջ 160 լրագրող կը գտնուի ճաղերու ետին:
Այս բռնաճնշումները ի վերջոյ յանգեցուցին Պրիւքսէլի եւ Անգարայի յարաբերութիւններուն մէջ լարուածութեան, սակայն Եւրոմիութեան արձագանգը, ինչպէս կը նշեն իրաւապաշտպանները, բաւական զուսպ է եւ անբաւարար, քանի որ Թուրքիա իր տարածքին միլիոնաւոր փախստականներ կը պահէ՝ թոյլ չտալով անոնց մտնել Եւրոմիութեան տարածք:
Ի տարբերութիւն Պրիւքսէլին, Եւրոմիութեան առաջատար ու ամէնէն ազդեցիկ անդամ երկիրներէն Գերմանիա օր օրի կ’ուժեղացնէ ճնշումները Անգարայի նկատմամբ, սպառնալով անգամ սահմանափակել Թուրքիոյ մէջ գերմանական ներդրումները, վերանայիլ Անգարային զէնք-զինամթերք մատակարարելու հարցը:
