Նիկոլ Փաշինեանի հետ ունինք տարբեր գաղափարախօսութիւններ, չեն համընկնիր ոչ գաղափարախօսութիւնը, ոչ սկզբունքները, ոչ ծրագիրը. Մենք կ’երթանք գրաւելու քաղաքապետարանը, մեծամասնութիւն պիտի կազմենք եւ իհարկէ պիտի տապալենք ՀՀԿ-ն: Այս մասին Մայիս 2-ին Սարի թաղի մէջ նախընտրական քարոզչութեան ընթացքին լրագրողներու հետ զրոյցին նշած է «Երկիր Ծիրանի» կուսակցութեան նախագահ, Երեւանի քաղաքապետի թեկնածու Զարուհի Փոսթանճեանը` անդրադառնալով «Դէմ եմ Հանրապետականին» նախաձեռնութեան առաջարկին` միանալ «Ելք»-ի հետ եւ յաղթել ընտրութիւններուն:
«Ով ուզում է մեզ միանալ, մենք մեծ սիրով նրանց կ’ընդունենք, որովհետեւ մենք գնում ենք գրաւելու: Իսկ այնտեղ արդէն, եթէ հնարաւոր լինի համագործակցութեան մեր սկզբունքների, գաղափարների շուրջ, մենք դա կ’անենք: Փաշինեանն արդէն իսկ պատգամաւոր է, նա պահանջուած է խորհրդարանում: Իսկ ես դառնում եմ քաղաքապետ եւ ազատագրումն սկսում եմ Երեւանից»,-յայտարարած է Փոսթանճեան:
Աւելի վաղ NEWS.am-ը յայտնած էր, որ «Դէմ եմ Հանրապետականին» նախաձեռնութիւնը կոչ ըրած է «Երկիր Ծիրանի» կուսակցութեան նախագահ, քաղաքապետի թեկնածու Զարուհի Փոսթանճեանին ու «Ելք» դաշինքով քաղաքապետի թեկնածու առաջադրուած Նիկոլ Փաշինեանին` միաւորուիլ: Ըստ նախաձեռնութեան` այդ պարագային մեծ կ’ըլլայ գալիք աւագանիի ընտրութիւններուն ՀՀԿ-ի չյաղթելու հաւանականութիւնը:
Նշենք, որ միաւորուելու մասին յայտարարելու վերջնաժամկէտը 4 Մայիսն է:
Նախաձեռնութեան պատրաստած տեսահոլովակին մէջ կը նշուի, որ «Ելք»-ը եւ «Երկիր Ծիրանի»ն կրնան ընտրութիւններուն քուէներու 51 տոկոսը ստանալ, սակայն օրէնսդրութիւնը թոյլ չի տար դաշինք կազմել: Փոխարէնը քաղաքապետ կը նշանակէ այն ուժը, որ 40 տոկոսէն աւելի ձայն կը ստանայ. Այսինքն եթէ «Ելք»-ը եւ «Երկիր Ծիրանի»ն 30-ական տոկոս ձայն ստանան, քաղաքապետ կը նշանակի 40 տոկոս ստացած ՀՀԿ-ն»: