Ռուսիոյ Պետական Տուման (Ազգային Ժողով) այսօր վաւերացուց հայ-ռուսական համատեղ հակաօդային պաշտպանութեան համակարգ ստեղծելու կապակցութեամբ պայմանագիրը: Ռուսիոյ խորհրդարանին ներկայացուած բացատրական տեղեկանքին մէջ նշուած է, որ համաձայնագրով կը նախատեսուի ստեղծել համատեղ համակարգ, որ կը դիտարկուի, որպէս ԱՊՀ տարածաշրջանային համակարգի մէկ մասը:
Յիշեցնենք, որ պայմանագիրը ստորագրուած էր Մոսկուա՝ 23 դեկտեմբեր, 2015-ին, Ռուսիոյ պաշտպանութեան նախարար Սերկէյ Շոյկուի եւ Հայաստանի նախկին պաշտպանութեան նախարար Սէյրան Օհանեանի կողմէ։ Պետդումային ներկայացուած տեղեկանքին մէջ նաեւ նշուած է, թէ նախատեսուած է, որ Ռուսիոյ եւ Հայաստանի հակաօդային պաշտպանութեան համակարգի համատեղ գործողութիւնները կը համակարգէ Ռուսիոյ Դաշնութեան ռազմաօդային եւ տիեզերական ուժերու հրամանատարը, իսկ համատեղ գործողութիւններու ընդհանուր հրամանատարութիւնը կ’իրականացնէ Ռուսիոյ Հարաւային գաւառի զօրքերու հրամանատարը:
Այս պայմանագիրը Հայաստանի խորհրդարանը վաւերացուցած էր 30 յունիսին, բաւական թէժ բանավէճերէ յետոյ։
Վերոյիշեալ տեղեկանքին մէջ նաեւ նշուած է, որ համատեղ համակարգը կը ֆինանսաւորեն երկու կողմերը: Համաձայնագիրը կնքուած է հինգ տարիով եւ ամէն հնգամեայ ժամկէտի լրանալէն ետք կարելի է երկարաձգել զայն։
30 նոյեմբերին, Մոսկուայի մէջ, ստորագրուած էր նաեւ «Հայաստանի Հանրապետութեան զինեալ ուժերու եւ Ռուսիոյ Դաշնութեան զինեալ ուժերու զօրքերու միացեալ խմբաւորման կապակցութեամբ» համաձայնագիրը, որ նոյնպէս չէր ընդունուած Հայաստանի մէջ։ Լեռնային Ղարաբաղի պաշտպանութեան նախկին նախարար Սամուէլ Պապայեանի կարծիքով, երկու համաձայնագրերուն մէջ որեւէ նոր բան չկայ, սակայն անոնք կրնան օգտակար ըլլալ հայկական կողմին համար:
Համաշխարհայնացման եւ տարածաշրջանային հետազօտութիւններու կեդրոնի ղեկավար, քաղաքագէտ Ստեփան Գրիգորեանի պնդմամբ, այս համաձայնագրերուն մէջ, հայկական կողմին համար որեւէ օգտակար տարր չկայ։
«Ակնյայտ երեւում է Ռուսաստանի շահը, քանի որ Ռուսաստանն ուզում է ուժեղանալ Հարաւային Կովկասում ու առաջին հերթին՝ ռազմական կոնտեքստում ուժեղանալ: Հայաստանի շահը չեմ տեսնում: Հիմա զարմանալի բան եմ ասում՝ մի քանի օր առաջ այդ մասին ասաց Սերժ Սարգսեանը: Նա ասաց՝ մեզ ծանր օրեր են սպասում, մենք ռեսուրսներ քիչ ունենք եւ այլն: Ես հարց եմ տալիս՝ չէ՞ որ Ռուսաստանի հետ պայմանագիր էք ստորագրել ու մեզ ասել էք՝ այդ համատեղ ուժերը հենց նրա համար են, որ Հայաստանն իր անվտանգութիւնն ապահովի: Դա նշանակում է, որ նա ասաց, որ այդ պայմանագրերը ոչ մի կապ չ’ունեն Հայաստանի անվտանգութեան հետ»,- ըսաւ Ստեփան Գրիգորեան:
