Ամերիկացի հեղինակաւոր փորձագէտները չեն բացառէր, որ գալ տարի Ղարաբաղի մէջ նոր ռազմական հակամարտութիւն կրնայ բռնկիլ:
«Միջնորդական ջանքերու ձախողման, սպառազինութիւններու մրցավազքի եւ հրադադարի յաճախակի խախտումներու հետեւանքով Լեռնային Ղարաբաղի մէջ ռազմական գործողութիւններու վերսկսման վտանգը երթալով կ’աճի», – փաստած է Ամերիկայի ամենազդեցիկ փորձագիտական կեդրոններէն մէկուն՝ Արտաքին յարաբերութիւններու խորհուրդի զեկոյցը, որուն նպատակն է կանխատեսել 2017-ի հաւանական հակամարտութիւններն ու անոնց հնարաւոր ազդեցութիւնը Միացեալ Նահանգներուն վրայ:
«Եթէ չ’ըլլան արդիւնաւէտ միջնորդական ջանքեր, հրադադարի խախտումներն ու նոր թափ ստացած լարուածութիւնը կրնան վերստին բորբոքել ղարաբաղեան հակամարտութիւնը՝ ապակայունացնելով Հարաւային Կովկասը: Այս կրնայ ազդել նաեւ Ամերիկայի տնտեսական շահերու եւ համաշխարհային նաւթային շուկայի վրայ»,- փաստած են վերլուծաբանները՝ չբացառելով, որ նոր պատերազմի հետեւանքով Ատրպէյճանէն կազի եւ նաւթի արտահանումը կրնայ ընդհատուիլ:
Ամերիկայի ազգային շահերուն լրջագոյնս սպառնացող եւ խիստ հաւանական կը համարուի ռազմական բախումը ՆԱՏՕ-ի եւ Ռուսիոյ միջեւ:
Ամերիկացի փորձագէտները նոյնչափ հաւանական ու վտանգաւոր կը համարեն նաեւ ռազմական գործողութիւններու աշխուժացումը թուրքերու եւ քիւրտերու միջեւ: Յաջորդ տարուան գլխաւոր վտանգներու շարքին նշուած են նաեւ քայքայիչ համացանցային յարձակումները Ամերիկեան ենթակառուցուածքներու վրայ, ինչպէս նաեւ հնարաւոր ահաբեկչութիւնները Ամերիկայի տարածքին կամ դաշնակից երկիրներու մէջ:
Զեկոյցը իր հերթին փաստած է, որ «Նորընտիր նախագահ Տոնալտ Թրամբ պաշտօնը կը ստանձնէ փոթորկայոյզ ժամանակներու մէջ, եւ հնարաւոր է՝ շատ ժամանակ չանցած արդէն անոր վարչակազմը կանգնի լուրջ արտաքին ճգնաժամի առջեւ»: