ՄԱԿ-ի մօտ Միացեալ Նահանգներու դեսպան Սամանթա Փաուըր, անցեալ շաբաթ 1915 թուականի իրադարձութիւնները բնորոշած է որպէս ցեղասպանութիւն: Այս մասին կը հաղորդէ Associated Press լրատուական գործակալութիւնը: Նիւ Եորքի մէջ, Խաղաղութեան Նոպէլեան մրցանակի դափնեկիր` Էլի Վիզելի յիշատակին նուիրուած արարողութեան ժամանակ, Սամանթա Փաուըր խօսած է մինչ օրս շարունակուող պատմական անարդարութիւններու մասին, անոնց շարքին յիշատակելով նաեւ Հայոց ցեղասպանութեան ժխտումը:
Գործակալութիւնը կ’ընդգծէ, որ յայտարարութիւնը արտառոց էր, հաշուի առնելով, որ Սամանթա Փաուըր կարգավիճակով Ամերիկայի երկրորդ ամենաբարձրաստիճան դիւանագէտն է եւ կրնայ այս ընկալուիլ որպէս անոր կողմէ քննադատութիւն Պարաք Օպամայի հասցէին, որ խոստացած էր յաղթանակի պարագային ճանչնալ հայերու ջարդերը, որպէս ցեղասպանութիւն, բայց յետոյ պարբերաբար դրժած էր խոստումը` «Ապրիլ 24-ի իր ուղերձներուն մէջ տեղի ունեցածը բնորոշելով որպէս 20-րդ դարու առաջին զանգուածային կոտորածներ եւ ողբերգութիւն, որ պէտք չէ կրկնուի»,- կը յիշեցնէ Associated Press:
Սամանթա Փաուըր մինչեւ Օպամայի վարչակազմի անդամ դառնալը ամերիկեան հեղինակաւոր Բիւլիթզըր մրցանակի արժանացած լրագրող էր, որ յաճախ կ’անդրադառնար ցեղասպանութիւններու հարցով Միացեալ Նահանգներու վարած քաղաքականութեան:
Միացեալ Նահանգներու Պետական Քարտուղարութեան խօսնակ Մարք Թոնըր պնդած է, թէ այս հարցով ամերիկեան պաշտօնական ուղեգիծը չէ փոխուած: «Նախագահն ու վարչակազմի միւս բարձրաստիճան պաշտօնեաները բազմիցս սգացած են եւ ճանչցած մէկեւկէս միլիոն հայերու նկատմամբ իրականացուած վայրագութիւնները` ընդգծելով, որ պատմական փաստերու ամբողջական, անկեղծ ու արդար ճանաչումը կը բխի բոլորի շահերէն», – յայտարարած է Պետական Քարտուղարութեան խօսնակը: