«Հակափտածութեան կոմիտէի, այդ թւում՝ Քննչական կոմիտէի աշխատանքի վերաբերեալ, կարեւոր է, որ ունենանք ելքի մասին որոշակի պատկերացումներ»։
Կառավարութեան հերթական նիստին ժամանակ այս մասին արձանագրեց ՀՀ վարչապետ Նիկոլ Փաշինեան:
«Նկատի ունեմ, որ մեզ պէտք են յստակ ցուցիչներ, այդ թւում՝ Կառավարութեանը ներկայացուող հաղորդման մէջ, որովհետեւ օրէնսդրութեամբ Կոմիտէն եւ Քննչականը տարեկան գործունէութեան հաղորդում են ներկայացնում։ Վերջին անգամ, երբ հաղորդումը ստացել եմ, նաեւ այդ հաղորդումը մակագրութեամբ խնդրել եմ լրացնել, թէ Կոմիտէի՝ դատարան ուղարկած գործերի ծաւալը ինչպիսի՞ն է, եւ ի՞նչ ծաւալ է, որ աւարտուել է դատավճռով, ինչքա՞նն են մեղադրական եւ արդարացման։ Դա կարեւոր ցուցիչ է, որովհետեւ երբեմն այդ հաշուետուութիւններում աւանդաբար ասւում է, որ յարուցուել է այսքան քրէական գործ, բայց դրա մէջ ծաւալի առումով ոչ մի դրամատիկ բան կարող է եւ չլինել, այսօր կարող է յարուցուել, վաղը կարող է կարճուել»,- նկատեց ան:
Վարչապետը նաեւ եւս մէկ կարեւոր արձանագրում կատարեց․ «Մեզ պէտք է արձանագրել՝ քրէական գործերի հարուցման հետ ի՞նչ է տեղի ունեցել։ Ես զայրոյթով արձանագրեցի, որ մեզ մօտ կան քրէական գործեր, որ 2018 թուականից աղմուկ-աղաղակով յարուցուել են, մէկ էլ մի օր յիշում ենք, ասում՝ այդ քրէական գործը, որ լրատուականների առաջին էջերում էր, ի՞նչ եղաւ, եւ ստանում ենք մի կարճ տեղեկանք՝ նախաքննութիւնը շարունակւում է: Սա անթոյլատրելի է, պէտք է թէ՛ հանրութիւնը, թէ՛ Կառավարութիւնը պատասխան ունենան։ Անթոյլատրելի է, որ կարող է լինել դէպք, որ քրէական գործ յարուցուի, դրուի դարակում, ու մէկ էլ այդ քրէական գործի մասին յիշենք 12 տարի յետոյ, ասենք՝ ի՞նչ եղաւ այդ գործը, պարզուի, որ դրա նախաքննութիւնը շարունակւում է։ Քննչական կոմիտէի դէպքում էլ դրան նմանուող իրադարձութիւններ ունենք, պէտք է բացառենք»։
