Հանրապետութեան նախագահ Վահագն Խաչատուրեան Մոնթեվիտէոյի մէջ հանդիպած է Ուրուկուէյի նախագահ Ժամանտու Օրսիի հետ:
Ողջունելով նորընտիր նախագահը՝ Հայաստանի նախագահը շնորհակալութիւն յայտնած է հրաւէրի համար, ինչին ի պատասխան Ուրուկուէյի նախագահը իր խօսքին մէջ շնորհակալութիւն յայտնած է Վահագն Խաչատուրեանին՝ երդմնակալութեան արարողութեան մասնակցելու համար եւ նշած, որ այցը նոր խթան պիտի հանդիսանայ երկու երկիրներու բարեկամութեան ամրապնդման համար:
Հանդիպման ընթացքին նախագահները շեշտած են, որ Հայաստանն ու Ուրուկուէյը միշտ ունեցած են բարեկամական յարաբերութիւններ, որոնք ունին ընդլայնուելու մեծ ներուժ տարբեր ուղղութիւններով:
Վահագն Խաչատուրեան առանձնայատուկ նշած է, որ երդմնակալութեան արարողութիւնը իր բնոյթով ժողովրդավարութեան եւ ժողովրդավարական հիմնարկներու կայացման լաւագոյն դրսեւորումներէն է:
Զրոյցի ընթացքին շեշտուած է դեսպանութիւններու բացման կարեւորութիւնը երկիրներու համագործակցութեան հետագայ ամրապնդման գործին մէջ։ Անդրադարձ կատարուած է նաեւ փոխադարձ հետաքրքրութիւն ներկայացնող ոլորտներու մէջ փոխգործակցութեան խթանման՝ տնտեսական, բարձր արհեստագիտութիւններու եւ այլ բնագաւառներու մէջ:
Հանդիպման աւարտին Հայաստանի նախագահը հրաւիրած է Ժամանտու Օրսին հնարաւորութեան պարագային այցելելու Հայաստան պատեհ պահուն:
