Հայկական կողմին համար սկզբունքային է, որ խաղաղութեան պայմանագրին մէջ յստակ ամրագրուի՝ սահմանազատումը պիտի իրականացուի խորհրդային շրջանի իրաւասու մարմիններուն տպագրուած եւ իրաւական փաստաթուղթերով հիմնաւորուած վերջին քարտէզներով: Ազգային Ժողովի Արտաքին յարաբերութիւններու յանձնաժողովի նախագահը կը հաւաստիացնէ՝ պաշտօնական Երեւանը կը շարունակէ սա պնդել:
«Եթէ այս սկզբունքը չպաշտպանուի ու չիրագործուի, ապա անհասկանալի է, թէ ինչպէս տեղի կ’ունենայ սահմանազատման գործընթացը», նշեց Սարգիս Խանդանեանը:
Սահմանազատումը Խորհրդային Միութեան ամենաթարմ՝ 1975 թուականի քարտէզներով իրականացնելը Հայաստանի առաջարկն է: Խաղաղութեան պայմանագրին մէջ զայն ներառելու հարցը դեռ կը քննարկուի, համաձայնութիւն չկայ: Հայկական կողմը փաստաթուղթին մէջ սահմանազատման սկզբունքներու ամրագրմամբ կ’ուզէ ապահովել գործընթացին յստակութիւնն ու կանխատեսելիութիւնը:
Ատրպէյճանի նախագահը նախօրէին ուղիղ յայտնած է՝ չեն ուզեր հիմք ընդունիլ ԽՍՀՄ վերջին քարտէզները: Իլհամ Ալիեւը յղում ըրած է 1940-էն 60-ականներու քարտէզներուն, պնդած է, թէ այդ փուլերուն ատրպէյճանական հողերը տրուած են Հայաստանին: «Այսինքն, անոնք կ’ուզեն մէկ կողմ թողել 1960-ականներու, 50-ականներու, 40-ականներու քարտէզները եւ յղում ընել 70-ականներուն, քանի որ մեր պատմական հողերը այդ ժամանակ արդէն անոնց տրուած էին։ Ուստի, մենք վճռականօրէն ընդդիմացած եւ կ’ընդդիմանանք անոր», նշած է Ալիեւ:
