Դամասկոսի մէջ, Սուրիոյ նախագահ Պաշշար Ասատ Փետրուար 23-ին ընդունած է Հայաստանի արտաքին գործերու նախարար Արարատ Միրզոյեանը:
Զրուցակիցները քննարկած են Սուրիոյ`աղէտէն տուժած շրջաններուն մէջ ստեղծուած իրավիճակն ու առկայ խնդիրները յաղթահարելուն ուղղուած աշխատանքները:
Հանդիպման օրակարգին վրայ էին նաեւ հայ-սուրիական երկկողմ յարաբերութիւններու հարցեր: Անդրադարձ կատարուած է միջազգային հարթակներու մէջ փոխգործակցութեան:
Քննարկուած են նաեւ տարածաշրջանային եւ միջազգային անվտանգութեան վերաբերող հարցեր:
Հայաստանի արտաքին գործերու նախարարը Սուրիոյ նախագահին ներկայացուցած է Հայաստան-Ատրպէյճան յարաբերութիւններու կարգաւորման գործընթացի վերջին զարգացումները, ինչպէս նաեւ Ատրպէյճանի կողմէ Լաչինի միջանցքի ապօրինի շրջափակման հետեւանքով ստեղծուած մարդասիրական ծանր իրավիճակը:
Միրզոյեան հանդիպած է նաեւ Սուրիոյ արտաքին գործերու նախարար Ֆայսալ Միքտատի հետ:
Արարատ Միրզոյեան ցաւակցութիւն յայտնած է գործընկերոջը եւ Սուրիոյ բարեկամ ժողովուրդին Փետրուար 6-ին տեղի ունեցած աւերիչ երկրաշարժին առիթով` յայտնելով Հայաստանի եւ հայ ժողովուրդին զօրակցութիւնը: Այս ծիրին մէջ ՀՀ արտաքին գործերու նախարարը նշած է, որ Հայաստանի կառավարութեան կողմէ ուղարկուած փրկարար ջոկատները առաջիններէն էին Սուրիոյ մէջ` յաւելելով, որ Հայաստանէն մարդասիրական օգնութեան արդէն երեք խմբաքանակ ուղարկուած է աղէտէն տուժած շրջաններ:
Արտաքին գործերու նախարարները քննարկած են նաեւ երկկողմ եւ բազմակողմ ձեւաչափերով հայ-սուրիական համագործակցութեան առնչուող հարցեր: Կողմերը արձանագրած են, որ երկու երկիրներու յարաբերութիւնները հիմնուած են հայ եւ սուրիացի ժողովուրդներու բազմադարեայ բարեկամութեան վրայ: Այս առումով ընդգծուած է, որ Սուրիոյ հայկական համայնքը իւրայատուկ կամուրջի դեր կը խաղայ երկու երկիրներուն միջեւ:
Հանդիպման օրակարգին վրայ էին նաեւ տարածաշրջանային անվտանգութեան խնդիրները: Արարատ Միրզոյեան Ֆայսալ Միքտատին ներկայացուցած է Ատրպէյճանի կողմէ Լաչինի միջանցքի արգելափակման հետեւանքով Լեռնային Ղարաբաղի մէջ ստեղծուած մարդասիրական ճգնաժամին մանրամասնութիւնները:
