Պրիւքսէլը, Ուաշինկթընն ու Փարիզը Ատրպէյճանին կոչ կ’ընեն բանալու Արցախը Հայաստանին կապող միակ ճանապարհը` Լաչինի միջանցքը` կանխելու համար մարդասիրական աղէտը: Պատերազմէն յետոյ Արցախի մէջ խաղաղապահ զօրակազմ տեղակայած Մոսկուան մինչեւ այս պահը լուռ է:
Երրորդ օրն է բնապահպաններ ներկայացող ատրպէյճանցիները փակ կը պահեն ճանապարհը, այդ շարքին` շտապօգնութեան ինքնաշարժներուն համար: Նաեւ Ատրպէյճանի վերահսկողութեան տակ անցած տարածքներով Արցախին մատակարարուող կազը անջատուած է: Ստեփանակերտը յայտնեց, որ վառելանիւթի պակաս կայ, ուսումնական հաստատութիւններուն մէջ ալ դասերը դադրեցուած են:
ԱՄՆ-ն Ատրպէյճանին կոչ ըրած է վերականգնելու ազատ տեղաշարժը Լաչինի միջանցքով: Գրառումը Թուիթըրով հրապարակեց Պեական Քարտուղարութեան խօսնակ Նետ Փրայսը:
«Լաչինի միջանցքի փակումը ծանր մարդասիրական հետեւանքներ ունի եւ կը խոչընդոտէ խաղաղութեան գործընթացին: Կոչ կ’ընենք Ատրպէյճանի կառավարութեան վերականգնելու ազատ տեղաշարժը միջանցքով: Յառաջ երթալու ճանապարհը բանակցութիւններն են», նշած է Փրայս:
Պաշտօնական Ուաշինկթընի այս կոչը` ատրպէյճաներէն ու անգլերէն, իր էջով զետեղած է նաեւ Պաքուի մէջ ԱՄՆ դեսպանատունը: Աւելի ուշ ամերիկացի պաշտօնեան ճեպազրոյցի ընթացքին ալ խօսեցաւ խնդիրէն` յայտարարելով, որ տեսած են նաեւ ուժանիւթային ենթակառուցուածքներու խափանումներու մասին հաղորդումները, խաղաղ բնակչութիւնը թիրախաւորելը անընդունելի կը համարեն:
«Ուժանիւթային ենթակառուցուածքի որեւէ խափանում կրնայ յանգեցնել մարդասիրական ճգնաժամի, յատկապէս, երբ ձմեռնային ամիսներ են: Եթէ միտումնաւոր է, ապա անընդունելի է թիրախաւորել Լեռնային Ղարաբաղի խաղաղ բնակչութիւնը», ընդգծած է Նետ Փրայս:
Ղարաբաղի կազամատակարարումը անջատելու մասին հաղորդումները մտահոգած են Եւրոմիութիւնը եւս: Պրիւքսէլը կոչ ըրած է Ատրպէյճանի իշխանութիւններուն` ապահովելու Լաչինի միջանցքով տեղաշարժի ազատութիւնն ու անվտանգութիւնը` համաձայն 2020 թուականի Նոյեմբեր 9-ի եռակողմ յայտարարութեան:
«Տեղաշարժի ազատութեան սահմանափակումները զգալի անհանգստութիւն կը պատճառեն տեղի բնակչութեան ու մարդասիրական մտահոգութիւններ կ’առաջացնեն», յայտարարած է Եւրոմիութեան Արտաքին Քաղաքականութեան Գրասենեակի մամուլի խօսնակ Փիթըր Սթանօն:
Աւելի յստակ էր պաշտօնական Փարիզը` կոչ ընելով Պաքուին առանց նախապայմաններու վերականգնելբւ Լաչինի միջանցքով երթեւեկութիւնը:
